İsveç Kənd Təsərrüfatı Elmləri Universitetinin professoru, FAO/WOAH-ın Transsərhəd Heyvan Xəstəliklərinə Nəzarət üzrə Qlobal Çərçivəsinin Tərəfdaşlıq və Maliyyələşdirmə Panelinin həmsədri Ulf Magnusson 2026- cı il 9-16 oktyabr aralığında Xəzər Universiteti Hasvet Baytarlıq təbabəti fakültəsində akademik səfərdə olmuşdur.

Səfərin əsas məqsədi fakültənin tədris proqramlarının və akademik fəaliyyətinin qiymətləndirilməsi, baytarlıq təhsilinin müasir beynəlxalq standartlara uyğun inkişafı, akademik heyətin peşəkar kompetensiyalarının gücləndirilməsi və beynəlxalq təcrübə mübadiləsinin təşviq edilməsidir. Səfər çərçivəsində fakültənin mövcud akademik fəaliyyətinin təhlili aparılmış, tədris prosesinin təkmilləşdirilməsi və gələcək inkişaf perspektivləri ilə bağlı məsələlər nəzərdən keçirilmişdir.

Akademik səfər çərçivəsində professor Ulf Magnusson 2026-cı il oktyabrın 12- də Xəzər Universitetinin Neftçilər kampusunda “Antibiotiklərə qarşı davamlılıq və ev heyvanları: Vahid Sağlamlıq konsepsiyasının mərkəzində” mövzusunda seminarla çıxış etmişdir. Seminarda antibiotiklərə qarşı rezistentliyin baytarlıq təbabəti və ictimai sağlamlıq baxımından yaratdığı çağırışlar, heyvan və insan sağlamlığı arasındakı fənlərarası əlaqələr, eləcə də “One Health” (Vahid Sağlamlıq) konsepsiyasının strateji əhəmiyyəti elmi müstəvidə müzakirə edilmişdir. Təqdimatdan sonra iştirakçıların fəal iştirakı ilə akademik fikir mübadiləsi aparılmış və onları maraqlandıran suallar cavablandırılmışdır.

14-15 oktyabrda Hasvet Baytarlıq təbabəti fakültəsinin dekanı Dr. Çiçək Əliyevanın təşkilatçılığı, prof. Ulf Magnusson və departament müdiri Dr. Səbinə Məmmədovanın iştirakı ilə BMT-nin Ərzaq və Kənd Təsərrüfatı Təşkilatının (FAO) Azərbaycandakı nümayəndəsi Nasar Hayat, AQTİ nümayəndə heyəti və Aqrar Xidmətlər Agentliyinin (AXA) sədr müavini Elməddin Namazov ilə əməkdaşlıq görüşü keçirilmişdir. Görüş çərçivəsində baytarlıq xidmətlərinin təkmilləşdirilməsi, peşəkar kadr hazırlığı və ali təhsil müəssisələri ilə praktiki fəaliyyət sahələri arasında inteqrasiyanın gücləndirilməsi məsələlərinə toxunulmuşdur.

Həmçinin, professor Ulf Magnusson`un Xəzər Universiteti Hasvet Baytarlıq təbabəti fakültəsinin tələbələri ilə interaktiv görüşü olmuş və baytarlıq sahəsinin müasir istiqamətləri,  gənc mütəxəssislərin inkişaf perspektivləri ətrafında geniş fikir mübadiləsi aparılmışdır.

Səfər çərçivəsində professor Ulf Magnusson`un Şamaxı rayonuna səfəri də  təşkil olunmuşdur. Səfər zamanı qonaq Şamaxının üzümçülük sahələrini, şərab emalı zavodunu, eləcə də Şamaxı Astrofizika Rəsədxanasını ziyarət edərək, bölgənin kənd təsərrüfatı potensialı, şərabçılıq ənənələri, istehsalat imkanları və elmi-tarixi irsi ilə yaxından tanış olmuşdur.

Professor Ulf Magnussonun akademik səfəri Xəzər Universitetinin Hasvet Baytarlıq təbabəti fakültəsində tədris və elmi-tədqiqat fəaliyyətinin inkişafı, tələbələrlə akademik bilik və təcrübə mübadiləsinin aparılması, beynəlxalq təcrübənin öyrənilməsi, eləcə də müxtəlif qurum və təşkilatlarla  keçirilən görüşlər çərçivəsində gələcək əməkdaşlıq istiqamətlərinin və birgə fəaliyyət imkanlarının müzakirəsi baxımından mühüm əhəmiyyət kəsb etmişdir.