Xəzər Universitetinin rektoru Dr. Raziyə İsayeva 2026-cı il 1-2 oktyabrda  ADA Universitetinin və Təhsildə Keyfiyyət Təminatı Agentliyinin (TKTA) birgə təşkilatçılığı ilə ali təhsildə keyfiyyətin təminatı üzrə üçüncü illik simpoziumda iştirak edib.

Simpozium çərçivəsində ali təhsildə keyfiyyət təminatı, proqramların hazırlanması və təkmilləşdirilməsi, akkreditasiya prosesləri, məzunların məşğulluğunun dəstəklənməsi, tələbə kompetensiyalarının inkişafı və süni intellektin tədris və öyrənmə proseslərinə inteqrasiyası kimi aktual məsələlər müzakirə olunub.

“İnstitusional inkişaf üçün akkreditasiyadan sonrakı strategiyalar” mövzusunda yüksək səviyyəli interaktiv panel müzakirəsi təşkil olunub. Paneldə Xəzər Universitetinin rektoru Dr. Raziyə İsayeva, Sumqayıt Dövlət Universitetinin rektoru, professor Nuralı Yusifbəyli, Azərbaycan Dövlət Neft və Sənaye Universitetinin rektoru, dosent Rüfət Əzizov, Azərbaycan Dövlət Aqrar Universitetinin rektoru, dosent Zəfər Qurbanov iştirak ediblər.

Çıxışı zamanı Dr. Raziyə  İsayeva akkreditasiya prosesinin yalnız qiymətləndirmə mərhələsi kimi deyil, ali təhsil müəssisəsinin davamlı inkişafını dəstəkləyən mühüm mexanizm kimi əhəmiyyətini vurğulayıb. O, akkreditasiyadan sonrakı dövrdə müəyyən edilmiş tövsiyələrin və inkişaf istiqamətlərinin institusional strategiyaya inteqrasiyasının, keyfiyyət təminatı mexanizmlərinin davamlı şəkildə təkmilləşdirilməsinin vacibliyinə diqqət çəkib.

Simpoziumun digər sessiyalarında ali təhsildə keyfiyyət təminatı sistemlərində yeni tendensiyalar, akkreditasiya prosesinin təkmilləşdirilməsi, daxili keyfiyyət təminatı və monitorinq mexanizmləri, məzunların məşğulluğunda karyera xidmətlərinin rolu, tələbə kompetensiyalarının inkişafı, təhsil proqramlarının hazırlanması və akkreditasiyası, eləcə də süni intellektin tədris və öyrənmədə istifadəsinin keyfiyyət təminatına təsiri ilə bağlı təqdimat və praktiki seminarlar keçirilib.