Xəzər Universiteti İT Departamentinin rəhbəri, Azərbaycan Kibertəhlükəsizlik Təşkilatları Assosiasiyasının eksperti Fərid Musayev süni intellektin iqtisadiyyata, əmək bazarına və cəmiyyətin gələcək inkişafına təsiri barədə fikirlərini bölüşüb.

Globalinfo.az-a açıqlamasında ekspert bildirib ki, süni intellektin müxtəlif sahələrə inteqrasiyası rəqəmsal transformasiyanı sürətləndirəcək, rutin və təkrarlanan tapşırıqların avtomatlaşdırılmasına, yeni biznes modellərinin və iqtisadi imkanların yaranmasına şərait yaradacaq.

Fərid Musayevin sözlərinə görə, bu proses bəzi iş yerlərinin azalmasına səbəb ola bilsə də, eyni zamanda, işin xarakterini dəyişəcək və süni intellekt sistemlərinin hazırlanması, idarə olunması və etik prinsiplərə uyğun fəaliyyətinə nəzarət sahələrində mütəxəssislərə tələbatı artıracaq. Gələcəkdə uğurlu olmaq üçün süni intellekti rəqib deyil, səmərəli iş vasitəsi kimi istifadə etmək bacarığı mühüm əhəmiyyət daşıyacaq.

Ekspert “Qızıl milyard” konsepsiyasına da toxunaraq qeyd edib ki, süni intellekt ağır və kütləvi əməyin bir hissəsini öz üzərinə götürərsə, insanlar elmə, incəsənətə, fəlsəfəyə və şəxsi inkişafa daha çox vaxt ayıra bilərlər. Bununla belə, texnologiyanın yaratdığı imkanlardan bütün bəşəriyyətin faydalanması vacibdir.

Fərid Musayev vurğulayıb ki, süni intellekt artıq gələcəyin deyil, indiki dövrün texnologiyasıdır və əsas məsələ onun imkanlarından səmərəli, məsuliyyətli və cəmiyyətin rifahına xidmət edəcək şəkildə istifadə etməkdir.

Mənbə: Globalinfo.az – Dünyanın gələcəyi ilə bağlı gizli ssenari – “Qızıl milyard” planı işə düşür?