Xəzər Universiteti İT Departamentinin rəhbəri, Azərbaycan Kibertəhlükəsizlik Təşkilatları Assosiasiyasının eksperti Fərid Musayev yaşlı insanların rəqəmsal xidmətlərdən istifadə zamanı qarşılaşdıqları çətinliklər və kibertəhlükələr barədə danışıb.

Oxu.Az və “Kaspi” qəzetində dərc olunan materialda ekspert bildirib ki, mürəkkəb interfeyslər, kiçik şriftlər və texniki terminlər yaşlı insanların bank tətbiqlərindən və digər rəqəmsal xidmətlərdən istifadəsini çətinləşdirir. Bu çətinliklər səhv əməliyyat etmək qorxusunu da artırır.

Fərid Musayevin sözlərinə görə, rəqəmsal savadlılığın aşağı olması yaşlı insanları kiberdələduzların hədəfinə çevirə bilər. Onlar özünü bank əməkdaşı və ya polis kimi təqdim edən şəxslərə şəxsi məlumatlarını, parol və PIN-kodlarını verə, həmçinin, saxta mesajlardakı şübhəli keçidlərə daxil ola bilərlər.

Ekspert problemin həlli üçün rəqəmsal tətbiqlərin daha sadə və əlçatan hazırlanmasını, böyük şriftlərdən və aydın təlimatlardan istifadəni, eləcə də yaşlılar üçün kibersavadlılıq təlimlərinin təşkilini vacib hesab edir. O, həmçinin, dövlət və özəl xidmətlərdə canlı dəstək imkanlarının qorunmasının rəqəmsal təcridin qarşısını almaq baxımından əhəmiyyətini vurğulayıb.

Mənbələr: Oxu.Az | Kaspi.az