İqtisadiyyat və menecment fakültəsi və İqtisadçılar Klubunun birgə təşkilatçılığı ilə 2026- cı il oktyabrın 11- də  8 ildən sonra TEDx səhnəsi yenidən Xəzər Universitetinə qayıdıb.

Tədbir Xəzər Universiteti üçün ilk təcrübə olmasa da, bu konfrans yeni təşkilati komandanı, fərqli baxış bucaqlarını, öz ideya və təcrübələrini bu platformada ilk dəfə bölüşən peşəkarları bir araya gətirib. Sürətlə inkişaf edən və dəyişən biznes və texnologiya dünyasına dair fikir mübadiləsi aparmaq, bilikləri dərinləşdirmək, eləcə də innovasiya sahəsində fəaliyyət göstərən mütəxəssislərin, gənc peşəkarların və tələbələrin ünsiyyətini təşviq etmək məqsədilə keçirilən tədbir bu istiqamətdə əlverişli mühit yaradıb.

Konfrans üç əsas mövzu üzərində qurulub: Qığılcım: ideyaların necə yarandığı və imkanlara necə çevrildiyinin araşdırılması.Yol: qət edilən yolları formalaşdıran çətinliklər, təcrübələr və qərarlar haqqında düşüncələr. Dəyişiklik: yeniliklərə uyğunlaşmağın və gələcəyə hazırlaşmağın əhəmiyyəti.

Bu mövzular iştirakçıları yeni yaranan çağırışları görməyə, imkanları müəyyənləşdirməyə və gələcək dəyişiklikləri nəzərə alaraq, bugünkü qərarlarını yenidən dəyərləndirməyə təşviq edib.

Tədbirdə aşağıdakı məruzəçilər dinlənilib: Fərid Nadirov – “Azər-Türk Bank” Açıq Səhmdar Cəmiyyəti İdarə Heyəti sədrinin müşaviri, VI “Yüksəliş” müsabiqəsinin qalibi; Kəmalə Rövşən – “Soulmark” klubunun təsisçisi, şəxsi brendinq üzrə mütəxəssis; Sara Rəcəbli – sahibkar, təkamül psixologiyası üzrə ekspert; Kənan Əkpərov – “DOST” Rəqəmsal İnnovasiyalar Mərkəzinin direktoru; Gəray Yusifov – sahibkar və texnologiya sahəsində təsisçi; Elçin Əzimli – yazıçı, biznes təlimçisi və mütəxəssis.

Tədbir bir daha göstərib ki, yeni ideyalar düşüncə tərzini dəyişə, fərqli baxışlar formalaşdıra və yeni imkanlara yol aça bilər.