Xəzər Universitetinin Karyera və Məzunlar Mərkəzinin təşkilatçılığı ilə 2025-ci il noyabrın 26-da Azərbaycan Respublikası Dövlət Neft Fondunun (ARDNF) əməkldaşları tərəfindən İqtisadiyyat və menecment fakültəsinin sonuncu kurs tələbələri üçün “Azərbaycanda dayanıqlı iqtisadi inkişafın təmin edilməsində ARDNF-nin rolu” mövzusunda maarifləndirici məlumat sessiyası keçirildi. Tədbir tələbələrin iqtisadi proseslər, dövlət fondlarının fəaliyyəti və ölkənin inkişaf strategiyası barədə praktiki biliklərini artırmaq məqsədi daşıyırdı.

Karyera və Məzunlar Mərkəzinin direktoru Zərifə Əliyeva çıxışında mərkəzin əsas missiyası, hədəfləri və fəaliyyət istiqamətləri barədə məlumat verərək bildirdi ki, tələbələrin peşəkar inkişafına dəstək göstərmək, onların əmək bazarına uğurlu inteqrasiyasını təmin etmək mərkəzin prioritet məsələlərindəndir. Z. Əliyeva həmçinin Mərkəz tərəfindən həyata keçirilən karyera xidmətləri, təcrübə proqramları, təlim və inkişaf layihələri barədə iştirakçıları məlumatlandırdı.

Görüşdə ARDNF-nin Srateji kommunikasiya şöbəsinin mütəxəssisi Solmaz Teymurlu, İnvestisiya departamentinin Səhmlər və alternativ investisiyalar şöbəsinin baş təhlilçisi Reyhan Şərifli, Strateji layihələr departamentinin baş iqtisadçısı Kamran Əlizadə, baş mütəxəssisi Aysel Sadıqlı fondun yaranma tarixi, fəaliyyət prinsipləri, missiyası və dəyərləri barədə ətraflı təqdimatla çıxış etdilər. Tələbələrə Fondun ölkə iqtisadiyyatında yer tutan strateji mövqeyi, neft gəlirlərinin idarə olunmasında şəffaflıq və uzunmüddətli inkişaf strategiyasının əhəmiyyəti barədə məlumat verildi. Bununla yanaşı, ARDNF tərəfindən maliyyələşdirilən müxtəlif infrastruktur və sosial layihələr, həmçinin gənclərin xarici ölkələrdə təhsilinə dəstək göstərən Dövlət Proqramının icrası haqqında da geniş məlumat təqdim olundu.

Tədbir tələbələr üçün həm nəzəri, həm də praktiki biliklərin zənginləşdirilməsi baxımından dəyərli platforma rolunu oynadı. Sonda iştirakçılar onları maraqlandıran sualları ünvanlayaraq, ARDNF nümayəndələri ilə interaktiv müzakirələr apardılar.