Xəzər Universitetinin rektoru Dr. Raziyə İsayeva 2026-cı il noyabrın 16- da Gürcüstan Texniki Universitetində keçirilən I Azərbaycan–Gürcüstan Rektorlar Konfransında iştirak edib.
Tədbirdə Azərbaycan Respublikasının elm və təhsil nazirinin müavini İdris İsayevin rəhbərlik etdiyi nümayəndə heyəti, Azərbaycanın Gürcüstandakı fövqəladə və səlahiyyətli səfiri Faiq Quliyev, Gürcüstanın təhsil, elm və gənclər nazirinin müavini Zviad Qabisoniya, eləcə də hər iki ölkənin ali təhsil müəssisələrinin rəhbərləri iştirak ediblər.
Konfrans çərçivəsində Azərbaycan və Gürcüstan universitetlərinin rektorlarının iştirakı ilə panel müzakirələri olub. Müzakirələrdə ali təhsil sahəsində ikitərəfli əməkdaşlığın perspektivləri, elmi-tədqiqat sahəsində birgə təşəbbüslər və universitetlərarası tərəfdaşlıq imkanları nəzərdən keçirilib.
Xəzər Universitetinin rektoru Dr. Raziyə İsayeva çıxışında ali təhsil müəssisələri arasında beynəlxalq əməkdaşlığın əhəmiyyətindən və regional tərəfdaşlığın inkişaf perspektivlərindən bəhs edib.
Konfrans çərçivəsində Dr. Raziyə İsayeva Gürcüstanın ali təhsil müəssisələrinin rəhbərləri ilə ikitərəfli görüşlər də keçirib. Görüşlərdə tələbə və akademik heyət mübadiləsi, birgə akademik proqramlar, Erasmus+ çərçivəsində əməkdaşlıq və yeni institusional tərəfdaşlıqların qurulması müzakirə edilib.