2025-ci il mayın 23-də Xəzər Universitetinin Neftçilər kampusunun həyətində Karyera və Məzunlar Mərkəzinin təşkilatçılığı ilə “Karyera Sərgisi – 2025”  keçirildi.

Sərgidə 50-yə yaxın aparıcı şirkət və təşkilat, nüfuzlu hotellər və turizm şirkətləri, tanınmış təhsil kompleksləri, tədris və tərcümə mərkəzləri, banklar və maliyyə qurumları, psixoloji xidmət və inkişaf mərkəzləri, dizayn və arxitektura sahəsində fəaliyyət göstərən kreativ studiyalar, layihə büroları və s. iştirak etdilər.

Sərgidə təmsil olunan qurumlar arasında SOCAR, Socar Polymer, KPMG, "Norm" ASC, Fish Farm, ABAD, ACCESS BANK, ABB bank,  Azər Türk Bank ASC, Yelo Bank, Pasha Sığorta, Dunya School, Landau School, AİESEC, Şəms Tərcümə Mərkəzi, EFE Kursları, Unidestin Təhsil şirkəti, Strateji Düşüncə Tələbə Diplomatiya Mərkəzi, Konsis Group (Tərcümə Mərkəzi), Birgə Sağlam İctimai Birliyi, Hiss Psixoloji Sağlamlıq Mərkəzi, Kashalata café (Azərbaycanın ilk inklüziv kafesi), Four Seasons Hotel Baku, Mercure Baku City, Ulu Hospitality Group, TABİA Group (Badamdar Hotel, Excelsior Hotel&SPA, Hilton Garden İnn Baku, Paulaner), Resant Group Hotel, Yeni Baki Hotel və s. yer almışdı.

Karyera və Məzunlar Mərkəzinin direktoru Zərifə Əliyeva öz çıxışında qeyd etdi ki, bu cür təşəbbüslər tələbə və məzunların əmək bazarına inteqrasiyasını dəstəkləməklə yanaşı, universitetin iş dünyası ilə əlaqələrini daha da möhkəmləndirir.

Şirkətlərin nümayəndələri tərəfindən tələbə və məzunlara  iş və təcrübə, ilkin müsahibələr, CV-lərin qəbulu və şəbəkələşmə imkanları təklif olundu.

Sərgidə “Xəzər”in işsiz məzunları da fəal iştirak edərək, öz bacarıq və potensiallarını nümayiş etdirmək və iş dünyası ilə birbaşa əlaqə qurmaq imkanı əldə etdilər. Həmçinin, sərgidə digər universitetlərin nümayəndələri də iştirak edərək, tədbirin əhatə dairəsini daha da genişləndirdilər.