2025-ci il aprelin 17-də Xəzər Universitetində Karyera və Məzunlar Mərkəzinin təşkilatçılığı ilə Elm və Təhsil Nazirliyi və Təhsilin İnkişafı Fondunun təşəbbüsü ilə yaranan III “Maarifçi” tələbə-məzun təcrübə proqramına dair maarifləndirmə-məlumat sessiyası keçirildi. Tədbirdə universitetin IV kurs bakalavr və I, II kurs magistr tələbələri, həmçinin məzunlar iştirak edib.

“Maarifçi” tələbə-məzun təcrübə proqramının məqsədi elm və təhsil sahəsində insan resurslarının formalaşdırılması, praktiki fəaliyyətlə tələbə və məzunların sahəvi bilik, bacarıqlarının artırılması, onların təhsil sahəsində müasir yanaşmaları öyrənmələri, həmçinin təhsil islahatlarının həyata keçirilməsi prosesinə dəstək olmaqdır. 

Proqram çərçivəsində iştirakçılar Elm və Təhsil Nazirliyinin Aparatı, tabe qurumları və regional təhsil idarələrində təcrübə keçmək imkanı əldə edəcəklər. Təcrübə proqramı çərçivəsində tələbə və məzunlar nazirliyin struktur bölmələrində həyata keçirilən layihə və proqramlarda, müxtəlif mövzular üzrə təlimlərdə, eləcə də təcrübəli rəhbər şəxslərlə mentorluq proseslərində iştirak imkanı qazanacaqlar.

Tədbiri Xəzər Universitetinin Karyera və Məzunlar Mərkəzinin direktoru Zərifə Əliyeva açaraq,  proqramın tələbə və məzunların peşəkar inkişafında oynadığı roldan bəhs edib. O, bu cür təşəbbüslərin gənclərin real iş mühiti ilə tanış olması və karyera planlamasında əhəmiyyətli rol oynadığını vurğulayıb.

Z. Əliyeva tələbə və məzunlara III “Maarifçi” proqramının əhatə dairəsi, müraciət qaydaları və iştirak tələbləri, eləcə də təcrübə müddətində təqdim olunan imkanlar barədə ətraflı məlumat verib.

Tədbir iştirakçılar tərəfindən maraqla qarşılanıb və III “Maarifçi” proqramına olan marağın daha da artmasına səbəb olub.