2025-ci il aprelin 11-də Xəzər Universitetinin Karyera və Məzunlar Mərkəzində Dövlət Məşğulluq Agentliyinin Bakı Regional Məşğulluq Filialının nümayəndələri ilə görüş keçirildi. Görüşdə filialın müdir müavini Vüqar Xəlilov və Təhlil və tərəfdaşlarla iş şöbəsinin müdiri Ədalət Səmidov iştirak edirdilər.

Görüşün əsas məqsədi tələbə və məzunların əmək bazarına inteqrasiyasını dəstəkləmək, onların məşğulluq imkanlarını genişləndirmək və tərəfdaşlıq çərçivəsində birgə layihələrin həyata keçirilməsi istiqamətində müzakirələr aparmaq idi.

Görüş zamanı bir sıra vacib mövzular – o cümlədən əmək yarmarkalarının təşkili, tələbə və məzunların işlə təmin olunması, ixtisaslara uyğun peşə hazırlıq kurslarının təşkili, real iş təcrübəsi imkanlarının yaradılması və dövlətin məşğulluq tədbirlərinə gənclərin cəlb olunması məsələləri ətrafında fikir mübadiləsi aparıldı.

Filialın nümayəndələri qurumun həyata keçirdiyi müxtəlif proqramlar, elektron platformalar və peşə hazırlığı layihələri barədə ətraflı məlumat verdilər. Onlar bildirdilər ki, tələbə və məzunların əmək bazarının tələblərinə uyğun peşə və bacarıqlarla təchiz olunması istiqamətində universitetlərlə əməkdaşlıq vacibdir və bu sahədə Xəzər Universiteti ilə birgə layihələrin həyata keçirilməsində maraqlı olduqlarını qeyd etdilər.

Eyni zamanda, əməkdaşlıq imkanları müzakirə olundu. Karyera və Məzunlar Mərkəzinin direktoru Zərifə Əliyeva mərkəzin geniş imkanlarından, tələbə və məzunlara yönəlik xidmətlərdən, görülən işlərdən, keçirilən tədbirlərdən və karyera dəstəyi təşəbbüslərindən danışaraq, bu əməkdaşlığın mövcud imkanları daha da genişləndirəcəyinə əmin olduğunu bildirdi.

Sonda gələcək əməkdaşlıq istiqamətləri müəyyən olundu və konkret tədbirlərin planlaşdırılması barədə razılıq əldə edildi.