2024-cü il dekabrın 3-də Xəzər Universiteti və Türkçü Düşüncə Birliyinin əməkdaşlığı ilə universitetin Mərmər zalında "Üçüncü türkçülük çalışmaları" konfransı keçirildi.

 Giriş sözü ilə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanli çıxış etdi. O, “tarix şüurunun millətlərin həyatında çox mühüm rola sahib olduğunu”  qeyd edərək, Azərbaycan və Qafqaz tarixinin problemləri və s. haqda geniş şəkildə fikirlərini bildirdi, konfransa öz işində uğurlar dilədi.

 Prof. Nəsib Nəsibli və "Prof. Zeki Velidi Togan" adına 1-ci oturumun sədri, Tarix və arxeologiya departamentinin müdiri Dos. Telman Nusrətoğlunun qısa çıxışlarından sonra məruzələr başlandı.

Prof. Nəsib Nəsiblinin "Tariximizin fəlsəfəsi", Xalq şairi Sabir Rüstəmxanlının "Tarix bizə niyə lazımdır?", Telman Nüsrətoğlunun "Müstəmləkə paradiqmalarından arınma", tarixçi Odər Qutluərin "Tarixdə türkçülük gərəyi!" başlıqlı məruzələrindən sonra, Güney Azərbaycandan Əli Babazadənin "İranda türklər əleyhinə fars şovinist tarixi" məruzəsini əhatə edən videoçarx izlənildi. Bununla ilk bölüm sona çatdı.

Görkəmli tarixci “Süleyman Əliyarlı”  adına ikinci oturumda Prof.Dr Abdullah Gündogdunun "Bozkır/Türk - İran/Fars ilişkiləri üzərinə" adlı məruzəsi dinlənildi.

 Millət vəkili Dr. Fazil Mustafa "Dəyişməyən ideoloji tarix anlayışında türkçülük mövzusu", tarixçi Əkbər N. Nəcəf "Apolitik dövlət - Türk dövlət ağlında gücün ümumiliyi", Prof. Konuralp Ercilasun (onlayn formatda) "Ümumtürk tarixində dövrlər necə olmalıdır?" başlıqlı məruzələrini konfrans iştirakçılarına təqdim etdilər.

Dos. Boran Əziz və Caner Karanın çıxışından sonra Güney Azərbaycandan tanınmış yazar Həsən Raşidinin "İranda Azərbaycan türklərinin çətin vəziyyəti: Pəhləvi hakimiyyəti dövründə və indi" adlı videoçarxı izlənildi.

Daha sonra Yasəmən Qaraqoyunlu "Azərbaycan tarixçiliyində haçalanma: "coğrafiya, yoxsa millət tarixçiliyi?", Rüfət Muradlı "Təbrizli Əli - Güneydə milli məfkurənin bayraqdarı", Azad Qaradərəli "Qədim türk tarixi va müasir ədəbiyyatımız" tezisli çıxışlar etdilər.

Dos. Gülarə Yeniseyin "Qacarlar - Hun Akinci qollarından İran taxtına uzanan uzun macəranın qəhrəmanları" mövzusunda videoçarxından sonra tarixçi Cəfər Cəfərlinin "Azərbaycan tarixşünaslığında sovet qalıqları - albançılıq və şirvançılıq" adlı məruzəsi eşidildi.

Konfransın sonunda məruzələr ətrafında dəyərləndirmə çıxışları oldu.