Xəzər Universitetinin Mədəni Antropologiya və Folklor İnstitutu (Xəzər MAFİ) dünya xalqlarının folklor irsinin tədqiqi və təbliği istiqamətində yeni nəşrini təqdim edib. İnstitutun elmi təşəbbüsü ilə hazırlanan “Koreya xalq nağılları” adlı kitab 2025-ci il 30 oktyabr tarixində Xəzər Universiteti Nəşriyyatı tərəfindən işıq üzü görüb.

Layihənin rəhbəri Xəzər MAFİ, kitabı tərtib edən və ön söz müəllifi isə Xəzər Mafi-nin koordinatoru, filologiya üzrə fəlsəfə doktoru, Dos. Aynur Qəzənfərqızıdır. Nəşrdə tərcüməçi kimi Leyla Məsimli, elmi redaktor qismində professor Vaqif Sultanlı, korrektor kimi Xəzər Universitetinin Humanitar, təhsil və sosial elmlər fakültəsinin Filologiya (Azərbaycan dili və ədəbiyyatı) ixtisası üzrə 2-ci kurs tələbəsi Aydan Əliyeva, rəssam kimi Təbiət elmləri və mühəndislik fakültəsinin Təsviri incəsənət müəllimliyi ixitası üzrə 2-ci kurs tələbəsi Aliyə Hümbətova, dizayner kimi isə Nərminə Qasımova fəaliyyət göstərmişdir.

Nəşrdə Koreya xalq yaradıcılığının ənənəvi süjetləri, mənəvi dəyərləri və mifoloji təfəkkürü əks etdirən seçmə nağıllar toplanmışdır. Kitabda həm mətnlərin tərcümə keyfiyyətinə, həm də onların elmi və mədəni kontekstdə təqdimatına xüsusi diqqət yetirilmişdir. Bu toplu müxtəlif xalqların mədəni irsinin müqayisəli folklor tədqiqinə mühüm töhfə verməklə yanaşı, tələbələr, folklorşünaslar və mədəni antropologiya üzrə tədqiqatçılar üçün də dəyərli mənbədir.

http://dspace.khazar.org/handle/20.500.12323/8142

Aydan Əliyeva

Filologiya (Azərbaycan dili və ədəbiyyatı) ixtisası üzrə 2-ci kurs tələbəsi,

Xəzər Universiteti