2025-ci il oktyabrın 17-də Xəzər Universitetinin Mərmər zalında universitetin Direktorlar və Qəyyumlar Şurasının və yeni təyin olunmuş rektorun təqdimatı keçirildi. Tədbirdə universitetin rəhbərliyi və əməkdaşları, məzunları və qonaqlar iştirak edirdilər.
Xəzər Universitetinin təsisçisi, Direktorlar və Qəyyumlar Şurasının sədri  Prof.Akad. Hamlet İsaxanlı geniş çıxış edərək, universitetin yaranma tarixindən danışdı. Qeyd etdi ki, Azərbaycanda ilk ingilisdilli özəl ali məktəb olan Xəzər Universiteti onun rəhbərliyi,  kollektivin fədakar əməyi ilə ölkənin təhsil sisteminin modernləşdirilməsində müstəsna rola malikdir və
ötən illər ərzində müasir ali məktəb, elmi və mədəni mərkəz kimi böyük nüfuz qazanmışdır. Xəzər Universiteti hər zaman təhsildə yeniliyin, demokratik idarəetmənin və beynəlxalq düşüncənin tərəfdarı olub.

Xəzər Universiteti Direktorlar və Qəyyumlar Şurasının üzvləri elan olundu və iştirak edən üzvlərə Prof.Akad. Hamlet İsaxanlı tərəfindən sertifikat təqdim olundu:

Dünya Məktəbi Kompleksinin direktoru Aygün İsayeva;     

Xəzər Universitetinin idarəetmə və tələbə işləri üzrə prorektoru Prof. İsaxan İsaxanlı;                                                       

NAB holdinqin vitse prezidenti Şəhram Oromi;

Xəzər Universiteti və Dünya Məktəbi Direktor və Qəyyumlar Şurasının üzvü, Medicana Ataşehir xəstəxanasının (Türkiyə) dermatoloqu Zeynəb Gürbüz İsayeva;

Xəzər Universiteti və Dünya Məktəbi Direktor və Qəyyumlar Şurasının üzvü, Maliyyə məsləhətçisi. Aytən İsayeva;

Kal'yari Universitetinin  (University of Cagliari; İtaliya) Psixiatriya şöbəsi, Tibb və ictimai səhiyyə fakültəsinin postdoktoral tədqiqatçısı Ülkər İsayeva;

Xəzər Universitetinin rektoru Dr. Raziyə İsayeva.

Sonra yeni rektorun təqdimaatı oldu. Məlumat verildi ki, Dr. Raziyə İsayeva Xəzər Universitetinin məzunudur, bakalavr dərəcəsini Beynəlxalq iqtisadi münasibətlər ixtisası üzrə, MBA dərəcəsini isə Menecment üzrə tamamlamışdır. Təhsil sahəsində fəlsəfə doktoru elmi dərəcəsini Finlandiyanın Laplandiya Universitetində almışdır. Xəzər Universitetində uzun müddət İnkişaf direktoru vəzifəsində çalışmış, İqtisadiyyat və menecement fakültəsinin dekanı olmuşdur. Dr. Raziyə İsayeva 2003-cü ildən etibarən Xəzər Universitetində MBA və magistr səviyyəsində dərs deyir.

Rektor Dr. Raziyə İsayeva Xəzər Universitetinin əsas fəaliyyət sahələrini əhatə edən geniş təqdimatla çıxış etdi.

Xəzər Universitetinin məzunları - İlahiyyat üzrə fəlsəfə doktoru, Milli Məclisin üzvü Ceyhun Məmmədov, ADA Universiteti Hüquq fakültəsinin dekanı, Hüquq üzrə fəlsəfə doktoru Rəşad İbadov,  həmçinin uzun illər Xəzər Universitetində dekan vəzifəsində çalışmış, hazırda Elm və Ali Təhsil üzrə Dövlət Agentliyində Ali təhsil müəssisələri ilə iş sektorunun müdiri, həmçinin SABAH qrupları İcra Komitəsinin rəhbəri Elza Səmədova çıxış edərək, Xəzər universitetinin ölkə təhsilindəki üstün fəaliyyətindən söz açdılar.

Tədbirdə Xəzər Universitetinin Kamera orkestri konsert proqramı ilə çıxış etdi.