Xəzər Universiteti Karyera və Məzunlar Mərkəzinin təşkilatçılığı ilə 2025-ci il noyabrın 1-də “Alumni Breakfast” (Məzunlarla səhər yeməyi)  adlı ənənəvi məzun görüşü keçirilib. Tədbirin əsas məqsədi Xəzər ailəsinin üzvlərini bir araya gətirərək, əlaqələrin möhkəmləndirilməsi, şəbəkələşmə imkanlarının genişləndirilməsi, ideya və təcrübə mübadiləsinin aparılması, eləcə də Məzunlar Fondunun yaradılmasına start verilməsi olub.

Tədbiri giriş sözü ilə Karyera və Məzunlar Mərkəzinin direktoru Zərifə Əliyeva açıb. O, məzunları səmimi salamlayaraq, Xəzər Universitetinin birləşdirici ruhundan, dəyərlərindən, məzunlar arasında həmrəylik və əməkdaşlığın vacibliyindən danışıb.  Z. Əliyeva bildirib ki, bu cür görüşlər yalnız nostalji məqsədi daşımır, eyni zamanda məzunlar arasında qarşlıqlı dəstək və birgə təşəbbüslər üçün yeni imkanlar yaradır.

Xəzər Universitetinin rektoru Dr. Raziyə İsayevaya  universitetin son nailiyyətləri, yeni yaradılan fakültə, mərkəz və laboratoriyaları, yeni hədəfləri haqqında geniş məlumat verib. O, universitetin məzunlarla əlaqəsinin strateji əhəmiyyətindən danışıb, eləcə də məzunlarla əməkdaşlıq perspektivlərindən bəhs edib. R. İsayeva, həmçinin Məzunlar Fondunun fəaliyyət istiqamətləri barədə məlumat verərək, məzunları bu təşəbbüsə qoşulmağa dəvət edib.

Məzunlardan Əhməd Həsənov (İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin sədrinin müşaviri) və Rəvan Məmmədrzayev (“Unity Technologies” şirkətinin təsisçisi və direktoru) tələbəlik illərindən, peşə təcrübələrindən və “Xəzər”in onlara qazandırdığı bilik və dəyərlərdən bəhs ediblər.

“Açıq mikrofon” bölməsində digər məzunlar da çıxış edərək, universitetlə gələcək əməkdaşlıq və dəstək planlarını səsləndiriblər. Onlar yaradılacaq Məzunlar Fonduna dəstək verməyə hazır olduqlarını qeyd ediblər.

Tədbir musiqi nömrələri ilə müşayiət olunub. Görüş məzunlara hədiyyə təqdim olunması və  xatirə fotolarılarının çəkilişi ilə yekunlaşıb.

“Alumni Breakfast” Xəzər Universitetinin məzunları arasında əlaqələrin möhkəmlənməsinə, birlik və əməkdaşlıq ruhunun daha da güclənməsinə xidmət edən ilhamverici görüş kimi yadda qalıb.