Xəzər Universiteti nümayəndə heyətinin Buxaraya səfəri həm yubiley tədbiri, həm beynəlxalq konfrans, həm də gələcək əməkdaşlıqlar baxımından əlamətdar hadisəyə çevrildi.

Səfərin ilk hissəsi Buxara Dövlət Universitetinin 95 illik yubileyinə həsr olunmuş təntənəli mərasim oldu. Yubiley tədbirində çıxış edən Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, universitetin rektoru t.ü.f.d. Raziyə Isayeva və Humanitar, təhsil və sosial elmlər fakültəsinin dekanı fil.ü.f.d. Milana Abbasova  Buxara Dövlət Universitetinin regionda elm, mədəniyyət və təhsilin inkişafında mühüm tarixi rolunu xüsusi qeyd etdilər.

Yubiley tədbirindən sonra nümayəndə heyəti “Cadidlər: Milli Özlük, Hüquqi Mədəniyyət və Dövlətçilik İdeyaları” mövzusunda beynəlxalq elmi konfransda iştirak etdi. Burada H. İsaxanlı “Təhsil, Maarifçilik və Milli Kimlik” (“Education, Enlightenment and National Identity”) adlı məruzəsi ilə çıxış etdi. Məruzə maarifçilik ideyalarının müasir dövrdə də aktuallığını göstərərək, iştirakçılar arasında geniş müzakirələrə səbəb oldu. Universitetin rektoru və fakültə dekanı da çıxış edərək, Azərbaycan və Özbəkistan arasında təhsil sahəsində əməkdaşlığın inkişaf perspektivlərinə toxundular.

Konfrans çərçivəsində Buxara Dövlət Universitetinin bütün fakültələrinin rəhbərlərinin və nümayəndələrinin iştirakı ilə geniş görüş də baş tutdu. Görüşdə Xəzər Universiteti haqqında ətraflı təqdimat keçirildi – universitetin strukturu, tədris proqramları, beynəlxalq layihələri və strateji istiqamətləri barədə məlumat verildi. Qarşılıqlı fikir mübadiləsi aparıldı, təhsil, tədqiqat və tələbə-müəllim mübadiləsi sahələrində əməkdaşlıq imkanları müzakirə edildi.

Səfərin ən mühüm nəticələrindən biri isə üç aparıcı universitetlə - Buxara Dövlət Universiteti, Asiya Xalqları Universiteti və Buxara Dövlət Pedaqoji Universiteti iləikitərəfli əməkdaşlıq müqavilələrinin imzalanması oldu. Bu müqavilələr birgə elmi tədqiqatların aparılması, akademik mübadilə proqramları, yeni tədris layihələri və mədəni tədbirlərin təşkili üçün geniş imkanlar açdı.

Buxara səfəri Xəzər Universitetinin beynəlxalq əməkdaşlıq sahəsində yeni səhifə açmaqla yanaşı, Azərbaycan və Özbəkistan arasında elm, təhsil və mədəniyyət körpüsünü daha da gücləndirdi. Bu təşəbbüslər gələcək nəsillərə yeni imkanlar yaradacaq uzunmüddətli əməkdaşlığın təməli kimi qiymətləndirilir.