2024-cü il noyabrın 15-də Karyera və Məzunlar Mərkəzinin təşkilatçılığı ilə Xəzər Universitetinin məzunu, Oslo Azərbaycan Evinin sədri, Oslo şəhər Östenşö rayonunun bələdiyyəsinin komitə üzvü, Skandinaviya Azərbaycanlıları Koordinasiya Şurasının Norveç üzrə əlaqələndiricisi Ramil Əliyev, həmçinin Norveçdə çalışan Oslo şəhər Marienlyst ibtidai məktəbinin məsləhətçisi, Norveç-Azərbaycanlılar Gənclər Təşkilatının (NAYO) idarə heyətinin sədri Fariz Nadir Rzayev və digərləri Xəzər Universitetində oldular.

Görüşdə Xəzər Universitetinin  rəhbərliyi, əməkdaşları və müəllimləri iştirak edib. Universitetin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı qonaqları salamlayıb, onları ali təhsil müəssisəsində görməkdən məmnun olduğunu bildirib.  Ramil Əliyev Xəzər Universitetindən məzun olduqdan sonrakı təhsili, Norveçdəki fəaliyyəti ilə bağlı geniş məlumat verib. Eyni zamanda o, tələbəlik illəri ilə bağlı xoş xatirələrini paylaşıb.

R. Əliyev Norveçdən olan qonaqları da təqdim edərək, onlar haqqında məlumat verib.

Görüşdə Norveç ali təhsil müəssisələri ilə Xəzər Universiteti arasında yeni əlaqələrin qurulması, genişləndirilməsi və inkişafı;  ali təhsil müəssisələrinin mərkəz, fakültə və kafedraları arasında qarşılıqlı faydalı əməkdaşlıq; birgə layihələrin həyata keçirilməsi; elmi-tədqiqat işlərinin aparılması; professor-müəllim heyəti və təhsilalanların mübadiləsi  və digər məsələlər geniş müzakirə olundu.