2024-cü il iyulun 29-da Xəzər Universitetinin koordinatoru olduğu Erasmus+ KA2 proqramının "Azərbaycanda İnstitusional Repozitoriyalar (Elektron Arxiv) şəbəkəsi vasitəsilə tədqiqat potensialının inkişafı" (DIRNA) adlı layihəsi çərçivəsində Gəncə Dövlət Universitetində (GDU) yay məktəbinin keçirilməsinə start verilib.

5 günlük yay məktəbində layihənin tərəfdaş Azərbaycan universitetlərindən – Bakı Dövlət Universiteti, Azərbaycan Texniki Universiteti, Azərbaycan Dövlət Gömrük Komitəsinin Akademiyası, Gəncə Dövlət Universiteti, Naxçıvan Dövlət Universitetiti, Lənkəran Dövlət Universiteti, Mingəçevir Dövlət Universiteti, Avropa tərəfdaşlarından isə Finlandiyanın Yyuvyaskyulya Universiteti, İtaliyanın l'Aquila Universiteti və Türkiyənin İzmir Yüksek Texnologiya İnstitutunun nümayəndələri iştirak edirlər.

Yay məktəbinin açılış mərasimində Gəncə Dövlət Universitetinin rektoru Yusif Yusibov çıxış edərək, layihə çərçivəsində keçiriləcək təlimlərin əhəmiyyətini vurğulayıb. Diqqətə çatdırıb ki, layihə elmi tədqiqatların idarə edilməsi ilə yanaşı, həm də tədqiqat nəticələrinə açıq çıxışın təmin edilməsinə dəstək verəcək və ali təhsil müəssisələri arasında elmi əlaqələri gücləndirəcək.

Xəzər Universitetinin rektoru İradə Xəlilova çıxışında universitetlərin tədqiqat potensialının artırılmasında DIRNA layihəsinin əhəmiyyətli rolundan danışıb, yay məktəbinin təşkilinə görə Gəncə Dövlət Universitetinə minnətdarlığını bildirib və layihənin işinə uğurlar arzulayıb.

Xəzər Universitetinin İnkişaf Mərkəzinin direktoru Raziyə İsayeva layihə haqqında ətraflı məlumat verib. Bildirib ki, layihənin məqsədi elektron arxiv şəbəkəsinin yaradılması ilə Azərbaycan universitetlərinin çap materialının, məqalələrin, kitabların və digər elmi nəşrlərin bir platformada toplanması, qorunub saxlanması, həmçinin bu materialların beynəlxalq aləmə çıxışının təmin edilməsidir. Eyni zamanda, Azərbaycanda elektron arxiv işini təkmilləşdirmək, aparılan elmi-tədqiqatların profilini yüksəltmək və beynəlxalq sferaya inteqrasiya olmasına köməklik etməkdir.

Türkiyənin İzmir Yüksek Texnologiya İnstitutunun kitabxana müdiri Gültekin Gürdal təqdimatla çıxış edib, universitet kitabxanasının təhsilin və tədqiqatın inkişafında rolundan, İnstitusional Repozitoriyalar (Elektron Arxiv) şəbəkəsi vasitəsilə tədqiqat potensialının inkişafından və Türkiyənin bu sahə üzrə təcrübəsindən danışıb.

İtaliyanın L’Aquila Universitetinin nümayəndələri Anna Tozzi, Francesco Tarquini və Grazia Dibartolomeo “Açıq Giriş və açıq elmin faydaları”, “Açıq elm alətləri”, “Kitabxana sistemləri və Açıq Girişin rolu” mövzusunda hibrid şəkildə təqdimatlarla çıxış etmişlər.

Qeyd edək ki, Gəncə Dövlət Universitetində  avqustun 2-dək  davam edəcək 5 günlük yay məktəbində Avropa tərəfdaş universitetlərinin nümayəndələri "Açıq elm və institusional repozitoriyaların önəmi", "Açıq nəşriyyat etikası, müəllif hüquqları, hüquqi problemlər” , "İnstitusional repozitoriyaların texniki tələbləri və xüsusiyətləri", "Etibarlı tədqiqat və innovasiyalar, araşdırma üçün etibarlı nəşriyyatlar" adlı təqdimatlar ilə çıxış edəcəklər və təcrübələrini bölüşəcəklər.