2025-ci il iyulun 13-də Bakı İdman Sarayında Xəzər Universitetinin 54-cü məzunluq mərasimi ke­çirildi. Tədbirdə universitetin rəhbərliyi, de­kan­lar,  departament müdirləri, müəllim və tələbələr, valideynlər, keçmiş məzunlar, qo­naqlar iştirak edirdilər. Milli məclisin deputatı, Xəzər Universitetin məzunu Ceyhun Məmmədov da tədbirin qonağı idi.

Mərasim Azərbaycan Respublikasının Döv­lət Him­­ninin ifası ilə başlandı.

Aparıcılar Xəzər Universitetinin yaranma və inkişaf tarixinə nəzər salaraq, hazırkı nailiyyətlərindən danışdılar. Qeyd etdilər ki,  2025-ci il iyunun 18-də dünyanın ən nüfuzlu reytinq təşkilatlarından biri olan "Times Higher Education" (THE) 2025-ci il üçün BMT-nin “Dayanıqlı İnkişaf Məqsədləri”nə əsaslanan, sosial və iqtisadi töhfələrinə görə fərqlənən yaxşı dünya universitetlərini müəyyənləşdirərək, açıqladığı “THE University Impact Rankings 2025” reytinq cədvəlində Xəzər Universiteti Azərbaycan üzrə yüksək göstərici ilə 401-600 aralığında qərarlaşıb. Həmin təşkilatın iyunun 19-da elan etdiyi “QS World  University  Rankings 2026” reytinqində isə Xəzər Universiteti dünyanın ən yaxşı 951-1000 universiteti aralığında yer almışdir.

Sonra bakalavr və magistrlərə diplomla­rın təqdim olunmasına başlanıldı. Təbiət elmləri və mühəndislik, İqtisadiyyat və menecment, Humanitar, təhsil və sosial elmlər, Hasvet baytarlıq təbabəti, Təbiət elmləri, sənət və texnologiya yüksək təhsil və İqtisadiyyat və biznes yüksək təhsil fakültələrinin məzunları səhnəyə dəvət olundular. Diplomları məzun­la­­ra universitetin rəhbərliyi, fakültə dekanları, de­par­ta­­ment müdirləri, müəllimlər və əməkdaşlar təq­dim etdilər.

Xəzər Universiteti Humanitar və sosial elmlər fakültəsinin 2011-ci il məzunu - Azərbaycan Elmi Tədqiqat Layihə İnstitutunun direktor müavini Fərhad Allahverdizadə universiteti bitirən məzunları təbrik etdi, onlara yeni həyat yollarında uğurlar arzuladı.

Qeyd olundu ki, çari tədris ilində, həmçinin, universitetin üç doktorantına  - Cəmilə Ağamalıyeva (Müqayisəli-tarixi və müqayisəli-tipoloji dilçilik ixtisası), Abebe Girma Gule (Ümumi iqtisadiyyat ixtisasi) və Nəzakət Zamanovaya (Təhsilin təşkil və planlaşdırılması ixtisası)  Azərbaycan Respublikasının Prezidenti yanında Ali Attestasiya Komissiyasi tərəfindən fəlsəfə doktoru elmi dərəcəsi və diplom verilmişdir. Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı tədbirdə iştirak edən Cəmilə Ağamalıyeva və Abebe Girma Gule`ni səhnədə təbrik etdi və onlara elmi fəaliyyətlərində uğurlar dilədi.

Sonra Prof.Akad. Hamlet İsaxanlı ənənəvi olaraq mərasimdə nitq söylədi, universitetin uğurlarından və qarşıda duran vəzifələrdən danışdı, məzunlara tövsiyələrini verdi.

Xəzər Universitetinin himni oxundu. Məzunlar Xəzər Universitetində əldə etdikləri bilik və bacarığı tətbiq edərək öz  ailələri, xalq və vətən üç­ün faydalı olacaqlarına, Xəzər Universitetinin şərəfini qo­­ruyacaqlarına and içdilər. Andın mətnini İqsadiyyat və menecment fakültəsinin məzunları Fuad Əmrəliyev və Aytac Şahveranova səsləndirdilər.

Xəzər Universittinin daha bir ənənəvi məzunluq mə­rasimi başa çatdı.