2025-ci il iyulun 20-21-də Xəzər Universitetinin təsisçisi, Direktorlar və Qəyyumlar Şurasının sədri Prof.Akad, Hamlet İsaxanlının rəhbərliyi ilə universitet əməkdaşları Quba, Qusar və Şabran rayonlarını əhatə edən mədəni-istirahət səfərinə çıxdılar. Bu səfər həm tədris ilinin rəmzi yekunu, həm də yeni akademik dövr üçün planların müzakirə edildiyi, yaradıcılıq və həmrəyliyin bir araya gəldiyi dəyərli bir təşəbbüs oldu.

Səfər boyu Xəzər Universitetinin Musiqi və incəsənət departamentinin müdiri, əməkdar müəllim, tanınmış pianoçu Zülfiyyə Sadıqova, departamentin müəllimləri aşıq Ramin Qarayev və Məhsəti Cabbarlı tərəfindən ifa olunan aşıq havaları, xalq mahnıları və musiqili nömrələr məclisə mədəni zənginlik və bədii ovqat bəxş etdi. Aşıq Ramin Qarayev və Dillər və ədəbiyyatlar departamentinin müdiri Dos. Dilbər Zeynalova tərəfindən professor Hamlet İsaxanlının şeirlərinin sazla və səslə təqdim edilməsi iştirakçılara xüsusi emosional məqamlar yaratdı.

Səfər təkcə istirahət deyil, eyni zamanda ideya mübadiləsi və gələcək fəaliyyətlər üçün ilham mənbəyi oldu. Yeni tədris ilində keçirilməsi planlaşdırılan tədbirlər, elmi-praktik konfranslar, ədəbi-bədii görüşlər və mədəni təşəbbüslər haqqında ilkin müzakirələr aparıldı. Fikir və təkliflər kollektiv arasında böyük maraq və ruh yüksəkliyi ilə qarşılandı.

Səfərin sonunda Xəzər Universitetinin kollektivi Şabran bələdiyyəsinin sədri Fidan Fərzəliyevanın qonağı oldular. Səmimi qarşılanan kollektiv sazla, sözlə ev sahiblərinə və məclis əhlinə sənət, poeziya, dostluq dolu anlar yaşatdı.

Bu səfər bir tərəfdən ötən tədris ilinin zəhmətini mənəvi şəkildə tamamlayaraq kollektivə ruh verdi, digər tərəfdən isə qarşıdakı dövr üçün yaradıcı və intellektual hazırlığın başlanğıcı kimi dəyərləndirildi. Xəzər Universitetinin elmə, sənətə və milli-mədəni dəyərlərə verdiyi önəmin bariz nümunəsi olan bu səfər iştirakçıların yaddaşında dərin iz buraxdı.