Xəzər Universitetinin təsisçisi, Direktorlar və Qəyyumlar Şurasının sədri, Prof.Akad. Hamlet İsaxanlı öz məktəb illərində birgə təhsil aldığı sinif yoldaşları Prof. Elmxan Mahmudov və həkim Müşafərim Əliyeva ilə birlikdə 2025-ci il iyulun 8-də onlara dərs demiş sevimli müəllimələri – hazırda 90 yaşlı Müşafərim müəllimə ilə görüşüblər.

Görüş Hamlet İsaxanlının Xəzər Universitetindəki otağında baş tutub. İllər öncə Gürcüstanın Gardabani rayonunun Kosalı kənd orta məktəbində təhsil almış bu üç məzun müəllimələri ilə uzun fasilədən sonra yenidən bir araya gəliblər.

Məlumat üçün qeyd edək ki, Hamlet və Elmxan məktəbi qızıl medalla, Müşafərim xanım isə gümüş medalla bitirmişlər. Görüş zamanı məktəb illəri xatırlanıb, səmimi söhbətlər aparılıb və keçmişin unudulmaz anları bir daha canlandırılıb.

Bu mənalı və duyğusal görüş müəllim-şagird münasibətlərinin illərlə necə dərinləşdiyinin bariz nümunəsi olub. Müşafərim müəllimə görüş zamanı öz şagirdlərini bu yaşında yenidən görməkdən böyük sevinç və qürur duyduğunu bildirib. O, onların hər birinin tanınmış alimlərə – xüsusilə Hamlet İsaxanlı və Elmxan Mahmudovun riyaziyyatçı alimlər kimi uğur qazanmalarına görə fəxr etdiyini vurğulayıb.

Görüşün sonunda xatirə şəkilləri çəkilib və gələcəkdə yenidən bir araya gəlmək arzusu ilə vida edilib.