2025-ci il iyunun 10-da Türkiyənin Ailə və Sosial Xidmətlər naziri Mahinur Özdemir Göktaş Azərbaycana səfəri çərçivəsində Xəzər Universitetinin professor-müəllim heyəti və tələbələrlə görüşüb. Tədbir Xəzər Universitetinin Tarix və arxeologiya departamentinin təşkilatçılığı ilə baş tutub. Nazir ilə universitet kollektivinin görüşündə Türkiyənin Azərbaycandakı Fövqəladə və səlahiyyətli  səfiri Prof.Dr. Birol Akgün də iştirak edib.

Tədbir hər iki ölkənin – Azərbaycan və Türkiyə respublikalarının Dövlət himnlərinin ifası ilə başlayıb. Tədbirin bədii hissəsində Xəzər Universiteti Kamera orkestrınin müşayiəti ilə bir sıra musiqi parçaları səsləndirilib, o cümlədən Üzeyir Hacıbəylinin "Çırpınırdı Qara dəniz" əsəri ifa olunub. Musiqili proqramla yanaşı rəqs nömrələri də təqdim edilib.

Xəzər Universitetinin təsisçisi, Direktorlar və Qəyyumlar Şurasının sədri Prof.Dr. Hamlet İsaxanlı qonaqları salamlayıb və Türkiyə - Azərbaycan arasında mövcud olan dostluq və qardaşlıq münasibətlərni daim inkişaf etdirməyin əhəmiyyətindən danışıb.

Tədbirin moderatoru,Tarix və arxeologiya departamentinin müdiri Dos.Telman Nüsrətoğlu ümumi Türk tarix və mədəniyyətinin ailə dəyərlərinə verdiyi önəmi vurğulyaraq, sözü  nazirə verib.

Nazir Mahinur Özdemir Göktaş  çıxışında gənclərə motivasiya verən fikirlər səsləndirib, öz karyera yolundan, Avropada islamofob bir mühitdə mlli kimliyini qoruyaraq apardığı siyasi mübaruzədən, qarşılaşdığı çətinliklərdən və bu yolda ailəsinin ona göstərdiyi dəstəkdən bəhs edib. Nazirin çıxışı professor- müəllim heyəti və tələbələr tərəfindən böyük maraqla qarşılanıb.