2025-ci il iyunun 12-də Xəzər Universitetində universitetin təsisçisi, Direktorlar və Qəyyumlar Şurasının sədri, Prof.Akad. Hamlet İsaxanlının təşəbbüsü və rəhbərliyi ilə “Təbii Zəkadan Süni Zəkaya Doğru” adlı yeni seminarlar silsiləsinə rəsmi şəkildə start verildi. Bu elmi təşəbbüs müasir dövrdə süni intellektin cəmiyyət və texnologiyalar üzərində artan təsirini araşdırmaq və bu sahədə bilik mübadiləsini təşviq etmək məqsədi daşıyır.

Seminarın açılışında  giriş nitqi söyləyən H. İsaxanlı süni intellektin bu gün elm və texnologiya sahələrində oynadığı önəmli roldan bəhs etdi. O bildirdi ki, süni intellekt artıq yalnız texnoloji sahələrlə məhdudlaşmayaraq, bütün elmi istiqamətlərə nüfuz etməkdədir və bu sahələrdə əhəmiyyətli yeniliklərə səbəb olur. H.  İsaxanlı qeyd etdi ki, bu seminarlar vasitəsilə tələbələrə və alimlərə bu texnologiyaların əsaslarını daha dərindən öyrənmək imkanı yaradılır.

Seminarlar silsiləsinin ilk tədbirində Xəzər Universitetinin Fizika və elektronika departamentinin əməkdaşları – Əhməd Asimov və Məhəmməd Əlizadə "Kompüter Elmlərinin Fiziki Əsasları" mövzusunda  çıxış etdilər.

Ə. Asimov çıxışında kompüter texnologiyalarının inkişafında fizika elminin mühüm rolunu vurğuladı. O, yarımkeçirici texnologiyaların tarixi və təkamülündən, onların kompüter çiplərindəki tətbiq sahələrindən və bu texnologiyaların süni intellektin formalaşmasında necə mühüm baza rolunu oynadığından danışdı. Həmçinin, kvant texnologiyalarının və nanoelektronikanın gələcəkdə süni intelekt üçün yeni imkanlar yaradacağına da toxundu.

M. Əlizadə isə elektrik və elektronika sahələrinin əsas anlayışları, mikrosxemlər və mikrokontrollerlərin prinsipləri haqqında ətraflı məlumat verdi. O, bu texnologiyaların kompüter elmləri ilə inteqrasiyası nəticəsində yaranan yeni inkişaf mərhələləri və süni intellektin bu proseslərə təsiri haqqında fikir bildirdi. Əlizadə, həmçinin, praktiki nümunələrlə mövzunu izah edərək, dinləyicilərin suallarını cavablandırdı.

Seminar müzakirə formatında davam etdi. İştirakçılar mövzu ətrafında  sual-cavab sessiyasında fəal iştirak etdilər, ideya mübadiləsi aparıldı.

Tədbirin sonunda H. İsaxanlı seminarlar silsiləsinin davam etdiriləcəyini və növbəti görüşlərdə müxtəlif sahələrin tanınmış alim və mütəxəssislərinin də iştirak edəcəyini bildirdi. Bu seminarlar Xəzər Universitetinin elmi-texnoloji yeniliklərə verdiyi dəyərin və multidissiplinar yanaşma ilə elmi tədqiqatları təşviq etmə məqsədinin bir göstəricisidir.