2025-ci il iyulun7-də Xəzər Universitetinin Hasvet baytarlıq təbabəti fakültəsinin Tədris xəstəxanasının açılış mərasimi olmuşdur. Tədbirdə dövlət qurumlarının və beynəlxalq təşkilatların nümayəndələri, ali təhsil müəssisələrinin rəhbərləri, media təmsilçiləri, sahənin tanınmış mütəxəssisləri və baytarlıq fakültəsi tələbələri iştirak etmişlər. Açılış mərasiminin başlanğıc hissəsində “Ağaclı” adlandırılan xalça ilməsinin kəsilməsi həyata keçirilmişdir. Xalçada əks olunan “Həyat Ağacı” motivi torpaq, həyat və sonsuzluğu simvolizə edərək, tədbirin ruhuna dərin məna qatmışdır.

Mərasim Azərbaycan və Türkiyə şəhidlərinin əziz xatirəsinin bir dəqiqəlik sükutla yad edilməsi və hər iki qardaş ölkənin dövlət himnlərinin səsləndirilməsi ilə başlamış, sonra açılış nitqləri ilə davam etdirilmişdir.

Tədbirdə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, Hasvet Anonim Şirkətinin İdarə Heyətinin sədri Hidayet Şimşek, Türkiyənin Azərbaycandakı Fövqəladə və Səlahiyyətli səfiri Prof. Birol Akgün, Azərbaycan Respublikasının Qida Təhlükəsizliyi Agentliyinin Heyvan Sağlamlığı və Bioloji Təhlükəsizlik Şöbəsinin müdiri, Respublikanın baş dövlət baytarlıq müfəttişi Qalib Əbdüləliyev, Aqrar Xidmətlər Agentliyinin sədr müavini Anar Əzimov, Kənd Təsərrüfatı Nazirliyinin Baytarlıq Elmi-Tədqiqat İnstitutunun direktoru Sialə Rüstəmova və Heyvandarlıq İnstitutunun direktoru Mahir Hacıyev çıxış edərək, bu mühüm təşəbbüsün baytarlıq təhsili, elmi tədqiqat və praktiki fəaliyyət sahələrində strateji əhəmiyyətini vurğulayıblar.

Sonra qonaqlar xəstəxananın lentkəsmə mərasimində iştirak edərək, xəstəxana ilə tanış olublar. Tədbir bədii hissə ilə davam etdirilmişdir.