Lütfəli Rəhim oğlu Əsgərzadə, qısaca Lütfi Zadə adı ilə tanınan, elektrik mühəndisliyi və süni intellekt sahəsində görkəmli mütəxəssis, riyaziyyatçı, Kaliforniya Berkli Universitetinin (University of California, Berkeley) əməkdar (emeritus) professoru, Avrasiya Akademiyasının beş qurucu üzvündən biri olan görkəmli alim sentyabrın 6-da Amerikada, Berkli (Berkeley) şəhərində vəfat etmişdir.

 Lütfi Zadə 1921-ci ildə Bakıda anadan olmuş, 1931-ci ildə ailəsi ilə İrana, əslən Ərdəbildən olan atasının vətəninə köçmüşdür. 1942-ci ildə Tehran Universitetini elektrik mühəndisliyi üzrə bitirmiş, 1944-cü ildə Amerikaya köçmüşdür. 1946-cı ildə MIT-dən (Massaçusets Texnologiya İnstitutundan) elektrik mühəndisliyi üzrə magistr dərəcəsi, 1949-cu ildə Kolumbiya Univeristetindən (University of Columbia) PhD dərəcəsi almışdır. 1957-ci ildə həmin universitetin professoru olmuş, 1959-cu ildən başlayaraq Kaliforniyada, Berkli universitetində çalışmağa başlamış, ömrünün sonuna qədər orada işləyib yaşamışdır.

Lütfi Zadə qeyri-səlis çoxluq, qeyri-səlis məntiq, qeyri-səlis hesablama kimi nəzəriyyələr qurmuş, diskret zaman siqnal analizində çox işlənən z-çevirmə nəzəriyyəsini quran iki mütəxəssisdən biridir. Bu nəzəriyyələr texnoloji və sosial proseslərdə öz tətbiqlərini tapmışlar. Lutfi Zadə Kaliforniya Berkli Universitetində "İnformasiya Texnologiyaları üzrə Zadə İnstitutu"nu təsis etmişdir.  Bir çox nüfuzlu elm və texnologiya qurumlarının üzvü olmuş, çoxsaylı mükafatlara, medallara və fəxri adlara layiq görülmüşdür. Əsərlərinə ən çox istinad edilən alimlərdən sayılır.

2012-ci ildən başlayaraq professor Lütfi Zadə, Türkiyəli tarixçi Halil İnalcık, beyin cərrahı Mahmud Qazi Yaşargil, bəstəkar Arif Məlikov və riyaziyyatçı alim, humanitar və social elmlər üzrə tədqiqatçı Hamlet İsaxanlı yeni tip akademiya – Avrasiya Akademiyasını qurmağa başlamış, bu məqsədlə Kaliforniyada, İstanbulda, Ankarada və Bakıda görüşlər keçirmişlər. 2016-cı il yanvarın 29-da Bakıda, Xəzər Universitetində Avrasiya Akademiyasının rəsmi açılışı olmuşdur.

Professor Lütfi Zadə dini, irqi, millətçi görüşlərdən uzaq duran görkəmli alim və gözəl insan idi. O və onun yaradıcılığı Azərbaycanda elmin inkişafına təsir göstərmişdir. Lütfi Zadə Azərbaycanda olmuş, ölkə prezidenti ilə görüşmüş, mükafatlara layiq görülmüşdür.

Professor Lütfi Zadənin xatirəsi onu tanıyanların və onun əsərlərindən bəhrələnənlərin qəlbində yaşayacaq. Professor Lütfi Zadənin ailəsinə və yaxınlarına dərin hüznlə başsağlığı verirəm.

Xəzər Universiteti Direktorlar və Qəyyumlar Şurasının sədri,

Avrasiya Akademiyasının qurucu üzvü professor Hamlet İsaxanlı