Azərbaycan Respublikasının 8 Noyabr – Zəfər Günü və 9 Noyabr – Dövlət Bayrağı Günü münasibətilə Türkmənistanın paytaxtı Aşqabadda təntənəli konsert proqramı təşkil olunub. Tədbir Maxtumqulu adına Milli Musiqili Dram Teatrında Azərbaycan və Türkmənistan incəsənət ustalarının iştirakı ilə keçirilib.
Mərasimdə Azərbaycanın Türkmənistandakı fövqəladə və səlahiyyətli səfiri Qismət Gözəlov və Türkmənistan mədəniyyət nazirinin müavini Nursehet Şirimov çıxış edərək, tarixi 44 günlük Vətən müharibəsində qazanılan Böyük Zəfərin əhəmiyyətindən və iki ölkə arasındakı strateji tərəfdaşlıq münasibətlərindən bəhs ediblər.
Tədbirdə Azərbaycan və Türkmənistanın musiqi əsərləri ifa olunub.
Konsert proqramında Xəzər Universiteti Musiqi və incəsənət departamentinin müdiri, Əməkdar müəllim Zülfiyyə Sadıqova da iştirak edib. O, Azərbaycanın Əməkdar artisti İlahə Əfəndiyeva və Türkmənistanın Əməkdar incəsənət xadimi Rövşən Nepesovun rəhbərlik etdiyi orkestrin müşayiəti ilə birgə çıxış edib.
Proqramda Üzeyir Hacıbəyli, Qara Qarayev, Tofiq Quliyev və Fikrət Əmirov kimi görkəmli bəstəkarların əsərləri ilə yanaşı, Azərbaycan xalq mahnıları ifa olunub və “Bakı tanqosu” əsərinin premyerası keçirilib.