Xəzər Universitetinin Neft mühəndisliyi departamentinin nəzdində yeni elmi-tədqiqat qrupları sırasında ilk qrup öz fəaliyyətinə başlamışdır. Yaxın gələcəkdə digər istiqamətlər üzrə də yeni qrupların yaradılması nəzərdə tutulur. İlk tədqiqat qrupu tərəfindən Azərbaycanın mürəkkəb geoloji şəraitə malik strukturunda aktual elmi-praktiki məsələlərin araşdırılmasına başlanılıb.
Tədqiqatın mövzusu: “Bulla-dəniz yatağında kəmər arxası təzyiqlərin idarə olunması sisteminin təhlili və elmi-metodoloji yanaşmalar” (Analysis of Casing Annulus Pressure Management Systems and Scientific-Methodological Approaches in the Bulla-Deniz Field)
Bulla-dəniz yatağı Azərbaycanın yüksək lay təzyiqi ilə xarakterizə olunan mürəkkəb neft-qaz yataqlarından biri olmaqla yanaşı, qazma prosesində qarşıya çıxan texniki çətinliklər və süxurların yüksək mexaniki möhkəmliyi ilə fərqlənir. Bu cür mürəkkəb geoloji şəraitdə qazma və istismar işləri zamanı yaranan əsas texniki çağırışlardan biri də kəmər arxası təzyiqlərin formalaşmasıdır. Sözügedən təzyiqlərin vaxtında və düzgün idarə olunmaması gələcəkdə quyuların bütövlüyünə, təhlükəsiz istismarına və ümumi hasilat prosesinin səmərəliliyinə mənfi təsir göstərə bilər.
Qeyd olunan amilləri elmi və praktiki baxımdan nəzərə alaraq, Bulla-dəniz yatağında kəmər arxası təzyiqlərin idarə olunması üzrə mövcud yanaşmaların və elmi tədqiqatların təhlili prioritet hesab edilmişdir. Məhz bu səbəbdən tədqiqat qrupumuz tərəfindən bu mövzu əsas tədqiqat istiqaməti kimi seçilmişdir. Gələcək mərhələlərdə mövzunun daha geniş miqyasda araşdırılması, müvafiq elmi mənbələrin və beynəlxalq təcrübənin təhlili, həmçinin yatağın spesifik geoloji-texniki xüsusiyyətləri əsasında ətraflı elmi müzakirələrin aparılması nəzərdə tutulur.