Xəzər Universitetinin Yüksək Texnologiyalar və Süni İntellekt (ETAI) Tədqiqat Mərkəzinin təşkilatçılığı ilə 2026- cı il oktyabrın 23–24-də “Təhsil işçiləri üçün süni intellekt” mövzusunda ikigünlük təlim keçirilib. Təlim müxtəlif universitetləri təmsil edən akademik heyət üzvlərini və müəllimləri bir araya gətirərək, süni intellektin kursların hazırlanması, tədris, fərdiləşdirilmiş öyrənmə və tələbələrin qiymətləndirilməsi sahələrində praktiki tətbiq imkanlarını araşdırmaq məqsədi daşıyıb.

Təlimdə Xəzər Universiteti, Odlar Yurdu Universiteti, Azərbaycan Dövlət Mədəniyyət və İncəsənət Universiteti və Milli Müdafiə Universitetinin nümayəndələri iştirak ediblər. Praktiki tapşırıqlar və birgə fəaliyyətlər vasitəsilə iştirakçılar süni intellekt alətlərinin tədris prosesini necə dəstəkləyə, tədris resurslarını təkmilləşdirə və ali təhsildə meydana çıxan yeni çağırışların həllinə necə töhfə verə biləcəyini araşdırıblar.

Təlimi Xəzər Universitetinin ETAI Tədqiqat Mərkəzinin direktoru və ABŞ-da fəaliyyət göstərən AEGIX İnstitutunun tədqiqatlar üzrə direktoru Dr. Gloria Shkurti Özdemir, eləcə də Böyük Britaniyanın Koventri Universitetinin baş mütəxəssisi və ETAI Tədqiqat Mərkəzinin üzvü Dr. Dolapo Fakuade aparıblar.

Təlimin ilk günü süni intellektin əsaslarına və kursların layihələndirilməsinə həsr olunub. İştirakçılar mövcud tədris proseslərini təhlil edib, qarşılaşdıqları əsas çətinlikləri müəyyənləşdirib və süni intellektin bu problemlərin həllinə necə kömək edə biləcəyini müzakirə ediblər. Praktiki sessiyalarda mühazirələrin və təlim məqsədlərinin hazırlanması, sillabusların strukturlaşdırılması, eləcə də testlər, nümunəvi situasiyalar, paylama materialları və oxu materiallarının xülasələri daxil olmaqla, müxtəlif tədris resurslarının yaradılması məsələləri əhatə olunub.

İkinci gün süni intellektdən istifadə etməklə, fərdiləşdirilmiş öyrənmə imkanlarına və qiymətləndirmə metodlarının təkmilləşdirilməsinə həsr edilib. İştirakçılar müxtəlif ehtiyac və bacarıqlara malik tələbələr üçün tədris materiallarının uyğunlaşdırılması üzrə praktiki tapşırıqlar yerinə yetirib, tələbələrin bilik və bacarıqlarının daha səmərəli qiymətləndirilməsinə imkan verən yeni yanaşmaları araşdırıblar. Bununla yanaşı, öz kursları üçün süni intellektdən istifadə qaydalarını hazırlayıb, tədris prosesində süni intellektin tətbiqinə dair fərdi və ya institusional Fəaliyyət Planları tərtib edərək təqdim ediblər.

Təlim yekun müzakirə sessiyası və Xəzər Universiteti tərəfindən verilən iştirak sertifikatlarının təqdim olunması ilə başa çatıb.

Xəzər Universiteti süni intellekti təhsil, tədqiqat və institusional inkişafın strateji istiqamətlərindən biri kimi prioritetləşdirir. Universitetin süni intellekt sahəsində təşəbbüsləri yalnız müəllimlərin peşəkar inkişafı ilə məhdudlaşmır, həmçinin, professor-müəllim heyətinin, tədqiqatçıların və doktorantların bu sahədə bilik və bacarıqlarının artırılmasını hədəfləyir. Bununla yanaşı, beynəlxalq alimlər, tədqiqatçılar, tələbələr və mütəxəssislər üçün süni intellektin qlobal məsələlərə, diplomatiyaya və akademik innovasiyalara transformativ təsirini araşdırmaq imkanları yaradılır.

Bu təşəbbüslər vasitəsilə Xəzər Universiteti süni intellekt savadlılığını gücləndirməyi, innovativ tədris və tədqiqat yanaşmalarını təşviq etməyi, akademik icmanı texnoloji transformasiyanın yaratdığı imkanlardan səmərəli istifadə etməyə və onun doğurduğu çağırışlara hazır olmağa dəstəkləməyi qarşısına məqsəd qoyur.