Xəzər Universitetinin İT mütəxəssisi Nicat Abdullayev 2026-cı il oktyabrın 26-da Azərbaycan Texniki Universitetində (AzTU) İrlandiya Respublikasının Cənub-Şərq Texnologiya Universitetinin (SETU) professoru Larry Stapletonun iştirakı ilə keçirilən mühazirədə iştirak edib.

Beynəlxalq Avtomatik İdarəetmə Federasiyasının (IFAC) “Pawel J. Nowacki Distinguished Lecturer” proqramı çərçivəsində təşkil olunan mühazirə “İnsan–maşın sistemlərinin gələcəyinin formalaşdırılması” (Shaping Human–Machine Futures) mövzusuna həsr olunub.

Mühazirə zamanı intellektual idarəetmə və avtomatlaşdırma texnologiyalarının cəmiyyətə və təşkilatlara təsiri, süni intellektin səhiyyədə tətbiqi, eləcə də texnoloji səmərəliliklə insan amili arasında tarazlığın qorunması məsələləri müzakirə edilib. Professor Larry Stapleto təhlükəsiz texnoloji inkişafda etik liderliyin, təşkilati mədəniyyətin və etimadın əhəmiyyətini vurğulayıb.

Qeyd edək ki, tədbir 2027-ci ilin oktyabrında AzTU-nun ev sahibliyi ilə keçiriləcək “IFAC TECIS 2027” beynəlxalq konfransına hazırlıq çərçivəsində təşkil olunub.