Xəzər Universitetinin rektoru Dr. Raziyə İsayeva 2026-cı il 22–23 oktyabrda Şimali Makedoniyanın paytaxtı Skopyedə keçirilən 3-cü Beynəlxalq Türk Dünyası Qadınlar Çalıştayında iştirak edib və elmi məruzə ilə çıxış edib.

Türk Dünyasının qabaqcıl qadınlarını bir araya gətirən tədbir Umay Ana Türk Dünyası Qadınlar Birliyinin təşkilatçılığı, Türkiyə Respublikasının Mədəniyyət və Turizm Nazirliyi, TÜRKSOY,  TİKA, YTB və digər tərəfdaş qurumların əməkdaşlığı ilə təşkil olunub.

Çalıştay TÜRKSOY-un “Türk dünyasında qadın” mövzusuna həsr edilmiş xüsusi rəsm sərgisinin açılışı ilə başlayıb. Sərgidə türk qadınının tarix boyu oynadığı önəmli rol, mədəni irsin qorunmasına verdiyi töhfələr və ictimai həyatda mövqeyi sənətin dili ilə əks olunub.

Tədbir çərçivəsində Dr. Raziyə İsayeva “Hənifə Məlikovanın təhsil və maarifçilik irsindən davamlı gələcəyə: elm, texnologiya, sahibkarlıq və liderlikdə Azərbaycan qadınları” mövzusunda məruzə ilə çıxış edib.

Məruzədə Azərbaycan qadınlarının tarix boyu təhsil, elm, ədəbiyyat, iqtisadi fəaliyyət və ictimai liderlik sahələrinə verdikləri töhfələr, eləcə də bu irsin gələcək nəsillərə ötürülməsi məsələləri diqqətə çatdırılıb. Çıxışda Sara Xatunun diplomatik fəaliyyəti, Xurşidbanu Natəvanın ədəbi və ictimai fəaliyyəti, Həmidə Cavanşirin təhsil və istehsal sahəsindəki təşəbbüsləri, İzzət Orucovanın elmi və texnoloji çalışmaları kimi tarixi nümunələrə toxunulub.

Məruzənin əsas diqqət mərkəzində maarifçi və pedaqoq Hənifə Məlikovanın təhsil və maarifçilik irsi dayanıb. Onun təhsil fəaliyyətinin, məktəb rəhbərliyinin, qızların təhsilinə verdiyi töhfələrin və xatirə yazılarının Azərbaycan qadınlarının ictimai və intellektual həyatındakı rolu baxımından əhəmiyyəti vurğulanıb.  Qadın əməyinin tanınması, peşəkar inkişaf imkanlarının genişləndirilməsi və qərar qəbuletmə proseslərində qadınların rolunun gücləndirilməsi davamlı gələcəyin əsas istiqamətləri kimi təqdim edilib.

İki gün davam edən çalıştay Türk dünyasında qadınların elm, mədəniyyət, incəsənət, təhsil və ictimai həyatda rolunun müzakirəsi, eləcə də ortaq mədəni dəyərlərin qorunması və gələcək nəsillərə ötürülməsi baxımından əhəmiyyətli platforma olub. Tədbirdə müxtəlif ölkələrdən akademiklər, tədqiqatçılar və vətəndaş cəmiyyəti təşkilatlarının nümayəndələri iştirak ediblər.