2026-cı il oktyabrın 15- də Xəzər Universiteti  Hasvet Baytarlıq təbabəti fakültəsinin tələbələri ət kəsimi, ətin emalı, saxlanması və qida təhlükəsizliyi proseslərini müşahidə məqsədilə “AzMeat” MMC-yə  səfər ediblər. 

Səfər çərçivəsində ət və ət məhsullarının istehsalı zamanı sanitar-gigiyenik tələblərə riayət olunması, baytarlıq-sanitariya nəzarətinin əhəmiyyəti, eləcə də məhsulların keyfiyyət və təhlükəsizliyinin təmin edilməsi ilə bağlı məsələlər diqqət mərkəzində olub.

Səfər baytarlıq təhsilinin praktiki istiqamətinin gücləndirilməsi və gələcək peşə fəaliyyətləri üçün zəruri olan nəzəri biliklərin istehsalat mühiti ilə əlaqələndirilməsi baxımından əhəmiyyət daşıyır. Eyni zamanda, ali təhsil müəssisəsi ilə istehsalat sektoru arasında əlaqələrin inkişafına, tələbələrin real iş mühiti ilə tanışlığına və müasir baytarlıq təbabətinin tələblərinə uyğun mütəxəssis kimi yetişmələrinə xidmət edir. Bu təşəbbüs “Vahid Sağlamlıq” (One Health) yanaşmasının əsas prinsiplərini - insan, heyvan və ətraf mühit sağlamlığının qarşılıqlı əlaqəsini  praktiki təhsil kontekstində ön plana çıxarır.