Xəzər Universitetinin Karyera və Məzun Mərkəzinin təşkilatçılığı ilə 2026-cı il oktyabrın 15-də “Alumni Talks Series” çərçivəsində Təbiət elmləri və mühəndislik fakültəsinin tələbələri üçün “DevOps: Koddan Production-a: Real Layihələr və Karyera İmkanları” mövzusunda seminar keçirilib.

Tədbirin qonağı Xəzər Universitetinin məzunu, İKTEX LLC şirkətində baş DevOps mühəndisi vəzifəsində çalışan Aslan Aslanlı olub. O, peşəkar təcrübəsini tələbələrlə bölüşüb, DevOps sahəsinin iş prinsipləri, real layihələrdə tətbiqi və bu istiqamətdə karyera imkanları haqqında məlumat verib.

Seminarda proqram kodunun hazırlanmasından işlək mühitə çıxarılmasına qədər olan proseslərə və DevOps yanaşmasının bu mərhələlərdəki roluna diqqət yetirilib. Görüş tələbələrə nəzəri biliklərin peşəkar iş mühitində tətbiqi ilə tanış olmaq və gələcək karyera istiqamətləri barədə daha aydın təsəvvür formalaşdırmaq imkanı yaradıb.

Seminarın davamı olaraq tələbələrin praktiki bilik və bacarıqlarının inkişafına yönəlmiş intensiv təlim proqramının- bootcampın keçirilməsi nəzərdə tutulur. Proqram çərçivəsində Linux, Bash, Git, Docker, Terraform, Ansible və Kubernetes üzrə əsas biliklərin praktiki tapşırıqlar vasitəsilə öyrədilməsi planlaşdırılır. Təlim iştirakçıların bu alətlərlə işləmək bacarıqlarını inkişaf etdirməsinə və DevOps proseslərini praktik səviyyədə mənimsəməsinə dəstək verəcək.

“Alumni Talks Series” çərçivəsində keçirilən görüşlər universitetin məzunları ilə tələbələr arasında təcrübə mübadiləsinə şərait yaradır, tələbələrin peşəkar inkişafına və əmək bazarı ilə tanışlığına töhfə verir.