Erasmus+ mübadilə proqramı çərçivəsində Türkiyənin İstanbul Gedik Universitetinin nümayəndələri 2026-cı il 29 iyun - 3 iyul aralığında Xəzər Universitetinə səfər ediblər.

Səfər çərçivəsində İstanbul Gedik Universitetinin Mühəndislik fakültəsinin dekanı Prof. Dr. Egemen Sulukan, Maşın Mühəndisliyi bölməsinin müəllimləri Dr. Doruk Gürkan və Dr. Redvan Ghasemlounia, Beynəlxalq əlaqələr şöbəsinin əməkdaşları Yücel Kamar və Ezgi Yildiz Xəzər Universitetində qonaq olublar.

Beynəlxalq əlaqələr şöbəsinin təşkilatçılığı ilə keçirilən görüşdə Xəzər Universitetinin Beynəlxalq əlaqələr şöbəsinin əməkdaşları, Təbiət elmləri və mühəndislik fakültəsinin, Təbiət elmləri, sənət və texnologiya yüksək təhsil fakültəsinin, eləcə də Fizika və elektronika departamentinin əməkdaşları iştirak ediblər.

Görüş zamanı hər iki universitetin fəaliyyəti, təhsil proqramları, elmi-tədqiqat imkanları və beynəlxalq əməkdaşlıq perspektivləri haqqında təqdimatlar keçirilib. Xəzər Universitetinin təqdimatından sonra İstanbul Gedik Universitetinin nümayəndələri öz universitetləri barədə məlumat veriblər və gələcək əməkdaşlıq istiqamətləri müzakirə olunub.

Səfərin növbəti günlərində qonaqlar Xəzər Universitetinin mərkəzi kampusu, laboratoriyaları və digər infrastruktur imkanları ilə tanış olublar. Universitetin akademik və elmi mühiti ilə yaxından tanışlıq qonaqlar tərəfindən maraqla qarşılanıb.

Səfərin son günündə İstanbul Gedik Universitetinin nümayəndələri üçün Bakı şəhərinin tarixi və mədəni məkanlarına ekskursiya təşkil edilib. Mədəni proqram çərçivəsində qonaqlar şəhərin görməli yerləri ilə tanış olublar.

Görüş iki universitet arasında mövcud əməkdaşlığın daha da inkişaf etdirilməsi və yeni əməkdaşlıq imkanlarının yaradılması baxımından mühüm əhəmiyyət daşıyır.