2025-ci ilin mayın 22-də  "UniDestin" Tədris Mərkəzinin rəsmi açılış mərasimi baş tutdu. Tədbirdə Xəzər Universitetinin əməkdaşları və tələbələri, müxtəlif ali təhsil müəssisələrinin nümayəndələri, media təmsilçiləri və təhsil sahəsində fəaliyyət göstərən mütəxəssislər iştirak ediblər.
Tədris Mərkəzinin meneceri, Xəzər Universitetinin “Beynəlxalq münasibətlər” ixtisası üzrə 2008-ci il bakalavr məzunu Ülviyyə Hüseynova çıxışında mərkəzin fəaliyyət istiqamətləri, qısa müddət ərzində əldə olunan nailiyyətlər və gələcək hədəflər haqqında məlumat verib. Onun sözlərinə görə, "UniDestin" özündə xaricdə təhsil, karyera inkişafı və şəxsi potensialın gücləndirilməsi sahələrində innovativ yanaşmaları birləşdirir.
Mərkəz Azərbaycanda bütün karyera mərhələlərini əhatə edən tam xidmət modeli təqdim edən ilk tədris platformalarından biri olaraq, təhsil alanlara və gənc mütəxəssislərə sistemli və davamlı dəstək göstərməyi qarşıya məqsəd qoyur. Burada təqdim olunan proqramlar müasir əmək bazarının tələblərinə uyğun şəkildə hazırlanıb və real nəticəyə yönəlib.

Tədbirə dəvət olunan Xəzər Universiteti Karyera və Məzular Mərkəzinin direktoru Zərifə Əliyeva çıxışında bildirdi ki, bu cür platformalar gənclərə yalnız bilik deyil, həm də motivasiya, təcrübə və real iş dünyası ilə əlaqə imkanları təklif edir.  O, tələbələri təqdim olunan imkanlardan maksimum dərəcədə faydalanmağa, şəbəkələşmə və özünüinkişaf proseslərinə aktiv qoşulmağa çağırdı.
Açılış mərasimi çərçivəsində interaktiv təqdimatlar, təcrübə mübadiləsi və şəbəkələşmə imkanları təşkil olunub. Tədbir iştirakçıları "UniDestin"in gənclərin peşəkar inkişafına töhfə verəcəyini və bu istiqamətdə yeni imkanlar yaradacağını qeyd ediblər.