2025-ci il mayın 8-də Xəzər Universitetinin Karyera və Məzunlar Mərkəzinin və “İnnab Business School”un birgə təşkilatçılığı ilə “Data analitikası nədir? Data analitik kimdir?” mövzusunda seminar keçirildi. Seminar, data analitika sahəsində 30 ildən artıq təcrübəyə malik tanınmış mütəxəssis və təlimçi Cem Sərtdaş`ın təqdimatında baş tutdu.

Tədbirin məqsədi tələbələrə data analitikası sahəsi haqqında ətraflı məlumat vermək, bu istiqamətdə onların nəzəri biliklərini artırmaq və praktiki yanaşmalarla tanış etmək idi.

Seminar zamanı Cem Sərtdaş data analitikasının mahiyyəti, bu sahədə istifadə olunan metod və alətlər, eyni zamanda data analitikin gündəlik fəaliyyəti və qarşılaşdığı real iş situasiyaları barədə ətraflı məlumat verdi.

Həmçinin, “İnnab Business School”un korporativ satış rəhbəri Nərmin Sarıyeva çıxışında şirkətin təklif etdiyi təlimlər barədə məlumat verdi və qeyd etdi ki, Xəzər Universitetinin tələbələri həmin təlimlərə xüsusi güzəştlə qoşulma imkanı əldə edəcəklər.

Tədbirdə iştirak edən tələbələr müxtəlif sahələrdə data analitikasının necə tətbiq olunduğu, bu peşəyə yiyələnmək üçün hansı bacarıq və biliklərin tələb olunduğu, həmçinin sahədə mövcud olan karyera imkanları barədə məlumat əldə etdilər. Seminar interaktiv şəkildə keçdi və iştirakçılar mütəxəssislərə suallar ünvanlayaraq maraqlandıqları məqamlarla bağlı geniş cavablar aldılar.

Xəzər Universitetinin Karyera və Məzunlar Mərkəzi bu kimi maarifləndirici tədbirləri davamlı şəkildə təşkil etməyi planlaşdırır. Mərkəzin əsas məqsədi tələbələrin əmək bazarına daha hazırlıqlı çıxmasına dəstək olmaq və onları müasir peşə istiqamətləri ilə tanış etməkdir.