2025-ci il aprelin 16-da Xəzər Universiteti Karyera və Məzunlar Mərkəzinin təşkilatçılığı ilə İqtisadiyyat və menecment fakültəsinin maliyyə, mühasibat və audit ixtisasları üzrə təhsil alan 3-cü və 4-cü kurs tələbələri üçün “KPMG Azerbaijan” şirkətinin “Audit – Karyera günü” keçirildi. 

Tədbirin əsas məqsədi tələbələrin karyera inkişaflarına dəstək olmaq, onlara audit sahəsində mövcud olan təcrübə proqramları və karyera imkanları barədə məlumat vermək idi.

“Audit - Karyera günü” çərçivəsində KPMG nümayəndələri - Audit üzrə direktor, Xəzər Universitetinin məzunu Mələk Abbaslı,  İnsan resursları üzrə mütəxəssis Səbinə Ağasoy, İkinci dərəcəli Baş Audit mütəxəssisi Amil Salmanlı tələbələrə KPMG şirkətinin fəaliyyət istiqamətləri, işə qəbul prosesi, təcrübə proqramları və şirkətdaxili öyrənmə imkanları haqqında ətraflı məlumat verdilər. Tədbirdə vurğulandı ki, KPMG əməkdaşlarının davamlı peşəkar inkişafını dəstəkləmək üçün geniş resurslara və beynəlxalq təcrübəyə malikdir.

Tədbir boyunca tələbələr audit sahəsində karyera qurmağın mərhələləri, bu sahədə tələb olunan əsas bacarıqlar, eləcə də KPMG-nin gənc mütəxəssislərə təqdim etdiyi inkişaf platformaları ilə yaxından tanış oldular.

Yekunda şirkətin nümayəndələri tələbələri maraqlandıran sualları cavablandırdılar.