Xəzər Universitetinin İqtisadiyyat və menecment fakültəsinə yeni dekan təyin olunub

Xəzər Universitetinin məzunu Raziyə İsayeva universitetin İqtisadiyyat və menecment fakültəsinin dekanı vəzifəsinə təyin olunub.

Raziyə İsayeva yeni təyinata qədər uzun illər ərzində Xəzər Universitetinin İnkişaf Mərkəzinin direktoru olaraq fəaliyyət göstərib.

R.İsayeva Xəzər Universitetində “Beynəlxalq iqtisadi münasibətlər” üzrə bakalavr dərəcəsi və Biznesin idarə edilməsi (MBA) üzrə magistr dərəcəsi alıb. O, Corc Vaşinqton Universitetindən “Layihələrin idarə edilməsi” üzrə magistr sertifikatına da malikdir.  Həmçinin,  Böyük Britaniya və ABŞ universitetlərində müxtəlif təlimlər keçib.

2024-cü ildə Finlandiyanın Lapland Universitetində “Postsovet universitetində tələbə məşğulluğu – Azərbaycanda və Estoniyada mövcud vəziyyət və perspektivlər” mövzusunda doktorluq dissertasiyası müdafiə edərək təhsil üzrə fəlsəfə doktoru dərəcəsini alıb. Doktorluq dissertasiyasında postsovet ölkələrində tələbələrin öyrənmə təcrübəsinin təkmilləşdirilməsi yollarını araşdırıb. Tədqiqat postsovet universitetində bunun necə qurulduğunu və tətbiq edildiyini nümayiş etdirməklə tələbə cəlb edilməsi haqqında mövcud biliklərə töhfə verir. Onu da qeyd edək ki, R. İsayevanın Lapland Universitetində keçən müdafiə işində Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı da yaxından iştirak etmişdir. 

R.İsayeva Erasmus+Aİ tərəfindən maliyyələşdirilən layihələrin hazırlanması və idarə edilməsində böyük təcrübəyə malikdir. 2016-2019-cu illər ərzində Azərbaycanda həyata keçirilən Erasmus+ "PETRA" (573630-EPP-1-2016-1-ES-EPPKA2-CBHE-JP) layihəsinin müəllifidir. Həmçinin o, bir çox digər beynəlxalq və milli layihələrin müəllifi və icraçısıdır. R.İsayeva Azərbaycanda fəaliyyət göstərən müxtəlif təşkilatlarda idarəetmə sahəsində böyük təcrübəyə malikdir. Uzun illər sənaye və insan resurslarının idarə edilməsi sahəsində çalışıb.

Yeni vəzifəsində R. İsayevaya uğurlar arzulayırıq.