2024-cü il oktyabrın 3-də Karyera və Məzunlar Mərkəzinin təşkilatçılığı, Dillər və ədəbiyyatlar departamentinin dəstəyi ilə 5 oktyabr - Beynəlxalq Müəllimlər Gününə həsr olunmuş “Məndədir, səndədir, müəllim ömrü” adlı tədbir keçirildi.

Tədbirdə Xəzər Universitetinin “Azərbaycan dili və Ədəbiyyatı müəllimliyi” və “Filologiya (“Azərbaycan dili və Ədəbiyyatı”) ixtisaslarına bu il qəbul olunmuş birinci kurs tələbələri, həmçinin eyni ixtisaslar üzrə müxtəlif illərdə təhsil almış məzunlar - Fərid Kərimov (CELT Colleges, xaricdə təhsil üzrə menecer),  Barat Əlizadə ( Makropack şirkətinin rəhbəri), Vəfa Abbaslı (Gədəbəy şəhər İlham Əliyev adına 1 nömrəli tam orta məktəbin direktor müavini, Azərbaycan dili və Ədəbiyyatı müəllimi),  Ayşəm Bəşirova (Azərbaycan televiziyası QSC - aparıcı, müxbir, redaktor),  İlahə Tinasanova (Bakı Modern Təhsil kompleksi, departament rəhbəri),  Arifə Mahmudova  (FZ Academy, Azərbaycan dili və Ədəbiyyatı müəllimi, təlimçi),  və Aytac Vəliyeva (ARB Media Group, “Gündəlik Teleqraf” MMC -  müxbir, redaktor), həmçinin, universitetdə onlara dərs demiış bəzi müəllimlər iştirak edirdilər.

Tədbirin əsas məqsədi məzunların eyni ixtisas üzrə təhsil alan birinci kurs tələbələri  ilə öz uğur hekayələrini paylaşaraq, ixtisaslarına qarşı olan maraqlarını artırmaq idi. 

Karyera və Məzunlar Mərkəzinin direktoru Zərifə Əliyeva öz çıxışında məzunlarla təhsil müəssisəsi arasında davamlı əlaqələrin qurulmasının əhəmiyyətindən danışdı. Dillər və ədəbiyyatlar departamentinin müdiri Dos. Dilbər Zeynalova məzunlarla bağlı xatirələrini danışdı və Musa Yaqubun “Müəllim ömrü” şeirini səsləndirdi. Departamentin müəllimi Dr.. Reyhan Mədətova birinci kurs tələbələrinə öz tövsiyələrini verdi.

Məzunlar öz çıxışlarında tələbəlik illəri, müəllimlər və universitetlə bağlı unudulmaz anlarını xatırladılar. Uğurlu karyeraya sahib olmaq üçün nələrə diqqət yetirmək lazım olduğunu, şəxsi inkişafın əhəmiyyətini, xarici dil biliyinin önəmini vurğuladılar. Həmçinin, məzun Barat Əlizadə müəllifi olduğu “Xəyalpərəst” və “Kod adı: Oyanış” adlı kitablarını Xəzər Universitetinin kitabxanasına hədiyyə etdi.

Tədbirin sonunda xatirə şəkilləri çəkildi.