2018-ci il iyunun 1-2-də Xəzər Universitetinin Mərmər salonunda universitetin bioloji elmlər departamentinin təşkilatçılığı ilə 1-ci “Tək Sağlamlıq: problemlər və onların həlli” mövzusunda beynəlxalq konfrans keçirildi.

Qeyd edək ki, konfrans haqqında keçən ilin dekabr ayından aşağıdakı beynəlxalq media resurslarında xəbər yaymlanmışdı:

• Tək Sağlamlıq Platformu (One Health Platform) https://onehealthplatform.com/ohp/calendar
• Nature Events https://www.nature.com/natureevents/science/events/65707-One_Health_Problems_Solutions
• One Health Initiative https://www.cbd.int/2011-2020/actions/country
• Convention on Biological Diversity https://chm.cbd.int/database/record/239825

Xəzər Universiteti Harvard Universitetinin Planetar Sağlamlıq İttifaqı konsorsiumunun tərkibinə daxil edilmişdir. Bu münasibət ilə Konsortiumun direktoru Xəzər Universitetinə video təbrik göndərmiş və konfransın gedişinə uğurlar diləmişdir (Videonu bu linkdən yükləmək olar: https://vimeo.com/271521181)

Məşhur universitetlərin, o cümlədən Xəzər Universitetinin də daxil olduğu Harvard Universitetinin Planetar Sağlamlıq İttifaqı 31 may və 1 iyun tarixində Böyük Britaniyanın Edinburq Universitetində illik konfransını təşkil etmiş və öz səhifəsində Xəzər Universitetində keçirilən konfransı “Tərəfdaşlıq tədbiri” kimi elan etmişdi (https://planetaryhealthannualmeeting.org/satellite-meetings/). Bu ittifaq məşhur Rokfeller Fondu tərəfindən maliyyələşdirilən və dünyanın 95-dən çox universitet, dövlət təşkilatları və tədqiqat institutlarının daxil olduğu bir təşkilatdır.

Beynəlxalq konfransda Azərbaycan, Türkiyə, Rusiya, İran, Gürcüstan, ABŞ, Kanada və İsveçrədən müvafiq elm sahələrinin 30 nəfərdən artıq görkəmli mütəxəssisi iştirak edirdi. Konfransda həmçinin Azərbaycanın Səhiyyə Nazirliyi, Ekologiya və Təbii Sərvətlər Nazirliyi, Fövqəladə Hallar Nazirliyi, Nəqliyyat, Kommunikasiya və Yüksək Texnologiyalar Nazirliyi, Kənd Təsərrüfatı Nazirliyi, Qida Təhlükəsizliyi Agentliyi, Nizami rayonu Bələdiyyəsi nümayəndələri iştirak edirdilər.

NİZAMİ Erasmus+ layihəsi, Global Alliance Grupu və Nərgiz klinikası konfransda iştirak etmiş və dəstəkləmişdirlər.

Konfransı giriş sözü ilə Xəzər Universitetinin Elmi işlər üzrə prorektoru dosent İradə Xəlilova açaraq, iştirakçıları salamladı və sözü universitetin təsisçisi, Direktorlar və Qəyyumlar Şurasının sədri professor Hamlet İsaxanlıya verdi. Professor Hamlet İsaxanlı çıxışında konfransda müzakirə olunan mövzunun həm Azərbaycan, həm də beynəlxalq aləm üçün əhəmiyyətindən danışdı, konfransa uğurlu iş arzuladı.

Sonra proqram üzrə məruzələrin dinlənilməsinə başlandı. İki gün ərzində ümumilikdə 30-dan artıq məruzə dinlənildi. Mövzular üzrə hər bölmədən sonra geniş sual-cavab sessiyaları keçirildi. Konfransın başlandığı gündən gənc tədqiqatçıların posterləri stendlərdən asılmış və fasilələr zamanı təqdimatları keçirilmişdir. Poster təqdimatlarının müsabiqəsi keçirilmiş, 7 nəfərdən ibarət Beynəlxalq Münsiflər Heyəti tərəfindən qiymətləndirilmiş və qaliblər elan edilmişdir. Münsiflər Heyətinin sədri Amerika Birləşmiş Ştatları Milli Ətraf Mühit Sağlamlığı Təşkilatının direktoru Dr. David Dyjack (David Dyjack, PhD, CIH, Executive Director of the National Environmental Health Association, USA) qalibləri elan etdi və onlara sertifikatlar təqdim etdi. Birinci yer Respublika Taun Əleyhinə Stansiyanın (Republican Anti-Plague Station) Təbii ocaqların infeksiyalarının monitorinqi bölməsinin entomoloqu, V.Axundov adına Milli Elmi Tədqiqat Tibbi Profilaktika İnstitutunun Parazitologiya şöbəsinin dissertantı entomoloq Yeganə Sultanova, ikinci yer Respublika Taun Əleyhinə Stansiyanın həkim mikrobioloqu Namiq Mustafayev, üçüncü yeri isə Xəzər Universitetinin Bioloji Elmlər Departamentinin doktorantı Moozhan Serpoush tutmuşdur.

Konfransın bağlanış mərasimində Xəzər Universitetinin Elmi işlər üzrə prorektoru dosent İradə Xəlilova konfransın işini yekunlaşdırdı, iştirakçılara sertifikat təqdim olundu və xatirə şəkilləri çəkildi.