2025-ci il noyabrın 6-da Xəzər Universitetində Tolerantlıq Evinin və universitetin Tarix və arxeologiya departamentinin birgə təşkilatçılığı ilə “Zəfər Günü: Tarixi yaddaş və milli kimlik” adlı tədbir keçirilib. Tədbir Azərbaycanın 44 günlük Vətən müharibəsində qazandığı tarixi Qələbənin beşinci ildönümünə həsr olunub.

Tədbir şəhidlərin xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb. Açılış nitqi ilə Xəzər Universitetinin rektoru Dr. Raziyə İsayeva çıxış edərək, Zəfər Gününün Azərbaycan xalqının milli kimliyinin, vətənpərvərlik ruhunun və birliyinin rəmzi olduğunu vurğulayıb.

Xəzər Universitetinin Tarix və arxeologiya departamentinin müdiri Dos. Telman Nüsrətoğlu və Tolerantlıq Evinin direktoru Fatma Paşazadə çıxış ediblər. Onlar bu günün tarixi və mənəvi əhəmiyyətindən, Zəfərin Azərbaycanın milli kimliyinin formalaşmasındakı rolundan bəhs danışıblar.

Tədbirdə Azərbaycanın dini icmalarını təmsil edən şəxslər – Milix Yevdayev (Dağ Yəhudiləri İcmasının sədri), Bəxtiyar Nəcəfov (Qafqaz Müsəlmanları İdarəsinin sədr müavini, İrəvan qazısı), Robert Mobili (Alban-Udi İcmasının sədri) və Toral Ağayev (Roma-Katolik Kilsəsinin Apostol Prefekturasının mətbuat katibi) çıxış edərək, Azərbaycanın çoxkonfessiyalı və multikultural dəyərlərinin dövlətin möhkəmliyinin və cəmiyyətin birliyinin əsas dayağı olduğunu bildiriblər.

Xəzər Universitetinin müəllimləri Dr. Rüxsarə Quliyeva “Zəfər Gününün beynəlxalq hüququn prinsipləri baxımından təhlili” və Dr. Yaqub Məmmədov “Qarabağda bərpa olunan arxeoloji tədqiqatlar: tarixin zəfərlə yenidən yazılması” mövzularında məruzələrlə çıxış ediblər.

Tədbirin ən emosional hissəsində qazilər və şəhid ailələri söz alıblar. Qazilərdən Şuşa Fatehi Şiraz Həsənov döyüş yoldaşlarının qəhrəmanlığından söz açaraq, Zəfərin xalqın birliyi və inamının təntənəsi olduğunu vurğulayıb. Suqovuşan Fatehi ləqəbli, Zəfər ordenli, Şəhid Polkovnik Babək Səmidlinin oğlu Mətləb Səmidli isə çıxışında atasının döyüş yolundan, onun Vətənə olan sarsılmaz sevgisindən və şəhidlik zirvəsinə ucalmasının ailəsi üçün həm qürur, həm də məsuliyyət hissi doğurduğundan səmimi duyğularla danışıb.

Sonra yazıçı İlqar Kamilin “9-cu Mərtəbə” adlı romanının təqdimatı keçirilib. Əsər şəhid leytenant Murad Nağıyevin həyatına həsr olunub. Təqdimat zamanı müəllifin çıxışı və qısa videoçarx nümayiş etdirilib.

Tədbir xatirə fotosu ilə yekunlaşıb.