2025-ci il 17–20 noyabr tarixlərində Çin Xalq Respublikasının paytaxtı Pekin şəhərində “Bir kəmər, bir yol - yüksək keyfiyyətli inkişaf: konsepsiyalar və fəaliyyətlər” adlı beynəlxalq konfrans keçirilmişdir. Avropa və Asiyanın 15-dən çox ölkəsindən 60-dan artıq nümayəndənin qatıldığı tədbir qlobal əməkdaşlıq, davamlı inkişaf və rəqəmsal transformasiya sahələrində müzakirə platforması kimi böyük əhəmiyyət kəsb etmişdir.

Konfransda Xəzər Universitetini təmsil edən rektor Dr. Raziyə İsayeva açılış nitqində “Kəmər və yol” təşəbbüsünün yeni – yüksək keyfiyyətli inkişaf mərhələsinin mahiyyətini geniş şəkildə şərh etmişdir. O, bu mərhələnin yalnız logistika və infrastruktur deyil, eyni zamanda elm, texnologiya, intellektual əməkdaşlıq və xalqlar arasında qarşılıqlı etimadın gücləndirilməsi kimi sahələrdə yeni imkanlar yaratdığını vurğulamışdır.

Dr. İsayeva çıxışı zamanı bilik iqtisadiyyatı, rəqəmsal ekosistemlər, elmi-tədqiqat infrastrukturunun gücləndirilməsi və universitetlərin qlobal əlaqələndirici platforma kimi rolunu xüsusi qeyd etmişdir. O, Azərbaycanın Cənubi Qafqazda strateji keçid nöqtəsi kimi həm nəqliyyat, həm də intellektual əməkdaşlıq baxımından mühüm bir körpü rolunu oynadığını diqqətə çatdırmışdır.

Nitqin davamında Dr. İsayeva Xəzər Universitetinin Çin ali təhsil müəssisələri ilə uğurlu əməkdaşlıq modelini təqdim etmişdir. O, xüsusilə Konfutsi İnstitutunun aktiv fəaliyyəti, tələbə və müəllim mübadiləsi proqramları, ortaq tədqiqat təşəbbüsləri, elm və innovasiya sahəsində genişlənən əlaqələr barədə məlumat vermişdir. Bu əməkdaşlığın yalnız təhsil deyil, həm də mədəni diplomatiya baxımından iki tərəf arasında yeni körpülər yaratdığı vurğulanmışdır.

Çıxışının sonunda Dr. Raziyə İsayeva Xəzər Universitetini və Azərbaycanı belə nüfuzlu beynəlxalq platformada təmsil etməkdən böyük məmnunluq duyduğunu qeyd etmiş, Çin ilə təhsil, elm, innovasiya və mədəniyyət istiqamətlərində daha geniş miqyaslı layihələrin həyata keçirilməsinə dair inamını ifadə etmişdir.