İngilis dili və ədəbiyyatı departamenti 2025-ci il dekabrın 3-də dil öyrənməsində Sİ-dən istifadə və elmi diskursda dürüstlük mövzularına həsr olunmuş iki seminar təşkil edib.

Seminarları Princ Sultan Universiteti (Səudiyyə Ərəbistanı Krallığı, Ər-Riyad paytaxt şəhəri) və Xəzər Universitetinin tədqiqatçısı Dr. İmran Muhəmməd və Xəzər Universitetinin professoru, İslam Azad Universitetinin (İran İslam Respubıikası) müəllimi Dr. Davud Kuhi aparıb. Tədbirdə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı iştirak edib.

Tədbir Humanitar, təhsil və sosial elmlər fakültəsinin dekanı Dr. Milana Abbasovanın çıxışı ilə açılıb. O, dil tədqiqatları, elmi dürüstlük və yeni texnoloji inkişafları birləşdirən müzakirələrin əhəmiyyətini vurğulayıb.

Akademik proqram Dr. Davud Kuhi`nin "Mərkəzdənqaçma və mərkəzəyönəlmə qüvvələri arasında mübarizə və elmi diskursda dürüstlük problemi" adlı seminarı ilə başlayıb. Çıxışında o, bu iki qüvvə arasında gərginliyin elmi yazıda əlaqəlilik, etibarlılıq və etik məsələləri necə formalaşdırdığını araşdırıb.

Sonra Dr. İmran Muhəmməd "Sİ-yə etibar və tənqidi təfəkkür: dil öyrənənlərin fikirləri" mövzusunda seminar keçirib. O, tələbələr arasında Sİ alətlərinə artan asılılığı araşdırıb və bu tendensiyanın onların tənqidi təfəkkür bacarıqlarına necə təsir etdiyini sinif təcrübəsindən real nümunələr əsasında müzakirə edib.

Tələbələr, müəllimlər və qonaqlar da daxil olmaqla iştirakçılar tədbirdə fəal iştirak edib, suallar verib və öz fikirlərini bildiriblər ki, bu da canlı və məzmunlu müzakirəyə səbəb olub.

Ümumilikdə, seminarlar müsbət qarşılanıb və həm tələbələr, həm də müəllimlər üçün faydalı olub.