Xəzər Universitetinin Psixologiya departamentinin əməkdaşı və Xəzər Psixoloji Xidmət Mərkəzinin psixoloq-psixoterapevti Mirsadiq Muxtarovun iştirakı ilə 2026-cı il oktyabrın 26-da Azərbaycan Dillər Universitetində “Asılılıq psixologiyası: maddə və davranış asılılıqları” mövzusunda maarifləndirici seminar keçirilib. Seminarın əsas məqsədi tələbələrdə asılılığın psixoloji xüsusiyyətləri, yaranma mexanizmləri, beyində baş verən dəyişikliklər və fərdin sosial həyatına təsiri haqqında ətraflı anlayış formalaşdırmaq, həmçinin, maddə və davranış asılılıqlarının xüsusiyyətləri, onların qarşısının alınması və psixoloji yardım imkanları barədə bilikləri artırmaq olub.

Seminarda asılılığın formalaşmasına təsir göstərən bioloji, psixoloji və sosial amillər, asılılıq davranışının yaranma və davametmə mexanizmləri, eləcə də bu prosesdə beynin mükafatlandırma sisteminin rolu ətraflı şəkildə izah edilib. Bununla yanaşı, maddə asılılığı ilə davranış asılılığı arasındakı fərqlər, onların fərdin emosional vəziyyətinə, gündəlik fəaliyyətinə, şəxslərarası münasibətlərinə və sosial uyğunlaşmasına təsiri haqqında məlumat verilib. Seminar asılılıq probleminin kompleks şəkildə anlaşılması, risk amillərinin müəyyənləşdirilməsi və bu sahədə elmi əsaslı yanaşmaların əhəmiyyətinin vurğulanması baxımından əhəmiyyət kəsb edib.

Mirsadiq Muxtarov çıxışı zamanı maddə asılılıqları ilə yanaşı, qumar, internet və digər təkrarlanan davranışlarla əlaqəli asılılıq formalarına toxunaraq, onların psixoloji və neyrobioloji əsaslarını izah edib. Asılılığın yaranmasında beynin mükafatlandırma sisteminin, emosional tənzimləmənin, stress amillərinin, fərdi xüsusiyyətlərin və sosial mühitin roluna diqqət çəkilib. Bununla yanaşı, asılılıq davranışlarının insanın qərarvermə qabiliyyətinə, özünə nəzarətinə, ailə və sosial münasibətlərinə təsiri, problemin erkən müəyyənləşdirilməsinin və vaxtında peşəkar dəstəyə müraciət edilməsinin vacibliyi vurğulanıb. Psixoloji yardım prosesində fərdi yanaşmanın, psixoterapiyanın və elmi əsaslı müdaxilə üsullarının əhəmiyyəti qeyd olunub. Tədbirdə Azərbaycan Dillər Universitetinin Psixologiya və pedaqogika kafedrasının müdiri, psixologiya üzrə fəlsəfə doktoru, dosent İranə Məmmədli də iştirak edib. Sonda İ. Məmmədli seminarın mövzusunun aktuallığını vurğulayaraq, çıxışla bağlı müsbət fikirlərini ifadə edib və bu kimi maarifləndirici tədbirlərin tələbələrin nəzəri biliklərinin genişləndirilməsi, psixoloji problemlərə elmi yanaşmanın formalaşdırılması və gələcək peşəkar fəaliyyətə hazırlıq baxımından əhəmiyyətini qeyd edib.