2026-cı il martın 2-də Xəzər Universitetinin uzun illər əməkdaşı olmuş Nanə Kələntərli ilə universitetdə görüş keçirilib. Tədbirdə universitetin rəhbər heyəti,  əməkdaşlar, əvvəlki illərdə universitetdə fəaliyyət göstərmiş müəllimlər, eləcə də məzunlar iştirak ediblər.

Görüşün əsas məqsədi Nanə Kələntərlinin şəxsi kitab kolleksiyasının universitetin kitabxanasına hədiyyə olunmasının təqdimatı olub.

Tədbir universitetin Kamera Orkestrinin qısa konsert proqramı ilə başlayıb.  Musiqi və incəsənət departamentinin müəllimi  Ramin Qarayev tərəfindən aşıq mahnıları ifa olunub.

Sonra Xəzər Universitetinin təsisçisi, Direktorlar və Qəyyumlar Şurasının sədri Prof.Akad Hamlet İsaxanlı çıxış edərək, Nanə xanımla bağlı xatirələrini və universitetin formalaşma dövrünə dair fikirlərini tədbir iştirakçıları ilə bölüşüb.

Daha sonra universitetin İdarəetmə və tələbə işləri üzrə prorektoru, Prof. İsaxan İsaxanlınin xüsusi videomüraciəti nümayiş olunub. Videomüraciətdə Nanə Kələntərlinin universitet həyatındakı xidmətləri yüksək qiymətləndirilib. Ardınca İsaxan İsaxanlı səbəbkarı şəxsən təbrik edərək, ona fəaliyyətində uğurlar arzulayıb.

P.rof. Əfqan Abdullayev, İngilis dili və ədəbiyyatı departamentinin baş müəllimləri Firəngiz Nəsirova və Kəmalə Əsgərova, eləcə də universitetin məzunu Lalə Hüseynli Nanə xanımla bağlı xoş xatirələrini və onun universitet mühitinə verdiyi töhfələri diqqətə çatdırıblar.

Sonda tort kəsimi mərasimi keçirilib, Nanə Kələntərli çıxış edərək, göstərilən diqqət və ehtirama görə təşəkkürünü bildirib.