Xəzər Universitetinin 35 illik yubiley tədbirləri çərçivəsində 2026-cı il martın 19-da  universitetin Mərmər zalında “Xəzər”: məzunların, tələbələrin və gələcəyin görüşdüyü yer” mövzusunda məzunların iştirakı ilə görüş keçirildi.

Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı çıxış edərək, bugünkü görüşün əhəmiyyətini qeyd etdi və bildirdi ki, məzun kimi universitetdən ayrılanlar indi dost kimi qayıdıblar. Universitetin yaranma tarixindən, bu yolda qarşıya çıxan çətinliklərdən, problemlərdən söz açan H. İsaxanlı xüsusi vurğuladı ki, belə bir təhsil ocağının—ingilisdilli özəl bir universitetin açılmasına cəmiyyətin özünün ehtiyacı var idi. Bu gün artıq “Xəzər”in fəaliyyətə başlamasından 35 il ötür. Qazanılan uğurların göz önündə olduğunu bildirən Hamlet İsaxanlı hökumət qərarı ilə yaradılan bu təhsil ocağının 35 il ərzində böyük inkişaf yolu keçdiyini, məzunlarının sorağının bir çox ölkələrdən gəldiyini, bir çox ölkələrdən də müəllimlərin, tələbələrin Xəzər Universitetində çalışdığını, oxuduğunu xüsusi qeyd etdi.Vurğuladı ki, universitetimizin gücü həm də onun mühitində, ailə, dostluq münasibətlərindədir.

“Xəzər”in imzası” sənədli filminin nümayişindən sonra  Xəzər Universitetinin rektoru Dr. Raziyə İsayeva çıxış etdi. Bildirdi ki, bu günlər bayram- bayrama qarışıb- həm 35 illik yubileyimiz, həm Novruz və Ramazan bayramları, həm də məzunlarla görüş. Dr. R. İsayeva universitetin ötən illər ərzində keçdiyi inkişaf yolundan, mövcud tədris strukturundan danışaraq,   xüsusi vurğuladı ki, Xəzər Universiteti ölkəmizin 4 aparıcı tədqiqat universitetindən biridir.

Söz alan  məzunlar Xəzər Universitetinin onların həyatında mühüm rol oynadığını qeyd etdilər və belə bir görüş üçün universitet rəhbərliyinə təşəkkürlərini bildirdilər.