Xəzər Universitetinin Həyat elmləri departamentinin təşkilatçılığı ilə Sumqayıt “Dünya” məktəbinin Azərbaycan bölməsində təhsil alan 3–4-cü sinif şagirdləri üçün 2026-cı il aprelin 30-da “Xəzər”də maarifləndirici ekskursiya təşkil edilib.

Ekskursiya çərçivəsində şagirdlər Həyat elmləri departamenti, eləcə də Kimya və kimya mühəndisliyi departamentinin laboratoriyaları ilə tanış olublar. Departament rəhbəri Dr. Cəmalə Eldarova şagirdlərlə görüşərək, laboratoriya şəraiti və təhlükəsizlik qaydaları haqqında məlumat verib.

Həyat elmləri departamentinin müəllimi, Dos. Gülbəniz Qasımova  şagirdlərə heyvanlar aləmi barədə danışıb, onların qorunmasının və canlılara qarşı məsuliyyətli münasibətin əhəmiyyəti vurğulanıb. Praktik hissədə şagirdlər mikroskop altında qurbağa sürfəsini (çömçəquyruğu) müşahidə edib, həmçinin, zəhərsiz su ilanı ilə tanış olublar.

Ekskursiya Kimya və kimya mühəndisliyi departamentində davam edib. Departamentin müəllimi Güllü Əliyevanın nümayiş etdirdiyi  müxtəlif kimyəvi reaksiyalar, qaz əmələ gəlməsi və “vulkan püskürməsi” effekti şagirdlər üçün  xüsusi maraq doğurub.

Şagirdlər, həmçinin, Memarlıq və dizayn departamentinin tələbələrinin hazırladıqları yaradıcılıq nümunələri ilə tanış olublar.

Ekskursiya şagirdlərdə elmə marağın artırılması və onların gələcək təhsil istiqamətlərinin formalaşdırılması baxımından mühüm əhəmiyyət kəsb edir.