Xəzər Universiteti Psixologiya Departamentinin koordinatoru Mələk Kərimova və Klinik psixologiya ixtisası üzrə magistrant Nigar Hüseynova tərəfindən hazırlanmış “Birinci kurs tələbələrinin universitet həyatına uyğunlaşma prosesində psixososial amillərin təhlili” adlı məqalə Azərbaycan Respublikası Təhsil İnstitutunun “Elmi Əsərlər” jurnalında dərc olunmuşdur (93-cü cild, 3-cü nömrə, 2025-ci il),

Məqalədə vurğulanır ki, universitet həyatına ilk addım atan tələbələr üçün bu dövr həm həyəcanverici, həm də emosional və sosial baxımdan çətinliklərlə müşayiət olunur. Bəzi tələbələr yeni mühitə asanlıqla uyğunlaşsa da, digərləri emosional gərginlik, psixosomatik əlamətlər və sosial təcrid kimi çətinliklər yaşayırlar.

Tədqiqat nəticələri göstərir ki, uyğunlaşma prosesində çətinlik çəkən tələbələr bəzən ali təhsildən uzaqlaşaraq təhsillərini yarımçıq qoyurlar. Bu isə onların universitet haqqında mənfi təsəvvürlər formalaşdırmasına, ailə münasibətlərinin zəifləməsinə və gələcəkdə karyera uğursuzluqları ilə üzləşmələrinə səbəb ola bilər.

Araşdırmada cinsiyyət, sosial dəstək, maddi vəziyyət, motivasiya, ev həsrəti və fərdi xüsusiyyətlər kimi psixososial faktorların tələbələrin uyğunlaşma prosesinə təsiri nəzəri çərçivədə əhatəli şəkildə təhlil edilib. Məqalənin məqsədi yalnız problemləri müəyyənləşdirmək deyil, həm də onların qarşısını almağa yönəlmiş profilaktik yanaşmalar üçün elmi əsaslar ortaya qoymaq olmuşdur.

Məqalə  aşağıdakı linkdə:

https://journals.arti.edu.az/journal-page?id=1265-malak-feruz-karimova-nigar-rahim-huseynova