2025-ci il mayın 7-də AZTV-də yayımlanan "Hədəf" proqramının xüsusi buraxılışında Pakistan-Hindistan münasibətləri və bölgədəki geosiyasi proseslər müzakirə olunub. Verilişdə xüsusilə Hindistanda Modi hakimiyyətinin Hindu milliyyətçiliyinə yönəlməsi və bunun ölkədəki dini, məzhəb və etnik müxtəlifliyə təhlükə yaratdığı vurğulanıb.

Xəzər Universitetinin Tarix və arxeologiya departamentinin müdiri dosent Telman Nüsrətoğlu proqramda çıxışı zamanı Hindistanın tarixən müsəlman türklərlə bağlılığını qeyd edib. O bildirib ki, Qəznəvi Mahmuddan başlayaraq Dehli Sultanlığı və Babür dövrünə qədər Hindistanın təxminən 700 illik bir mərhələsi türk-müsəlman mədəniyyəti ilə səciyyələnib. Tac Mahal başda olmaqla, Unesco-nun siyahısına daxil olan əsas abidələrin əksəriyyəti məhz bu dövrdə inşa olunub.

Proqramda həmçinin Əkbər Şah dövründəki tolerantlıq siyasətindən, Kəşmir məsələsinin tarixi və hüquqi əsaslarından, 1948-ci ildəki BMT qərarına əsasən keçirilməli olan referenduma toxunulub.

Verilişdə Pakistanın Azərbaycanın və Türkiyənin yaxın müttəfiqi olduğu və bölgədəki radikal qrupların əsasən xarici xüsusi xidmət orqanlarının təsiri altında fəaliyyət göstərdiyi də bildirilib. Çin-Pakistan əməkdaşlığı və ABŞ-Hindistan yaxınlaşmasının bölgədəki gərginlikləri daha da artırdığı qeyd olunub.

Telman Nüsrətoğlu çıxışında Kəşmirin Pakistan üçün "Misak-ı Milli" olduğunu vurğulayıb və bu bölgənin strateji mövqeyinə diqqət çəkərək, yaşanan gərginliyin təsadüfi olmadığını bildirib.