2025-ci il martın 12-də Karyera və Məzunlar Mərkəzinin və Dillər və Ədəbiyyatlar departamentinin birgə təşkilatçılığı ilə  Xəzər Universiteti Nərimanov korpusunun İnciçiçəyi salonunda Azərbaycan dili və ədəbiyyat müəllimliyi və Filologiya (Azərbaycan dili və ədəbiyyatı)” ixtisası üzrə təhsil alan tələbələr üçün televiziya və Radio aparıcısı, aktyor Saleh Bağırovun “Qloballaşan dünyada ədəbi danışıq dilinin və düzgün nitqin əhəmiyyəti” mövzusunda seminarı keçirildi.

Karyera və Məzunlar Mərkəzinin direktoru Zərifə Əliyeva tədbiri açaraq, Mərkəzin fəaliyyət istiqamətlərindən, xidmətlərindən, məzunlarla əlaqələrin əhəmiyyətindən bəhs etdi. Həmçinin o, təşkil olunan belə tədbirlərin tələbələrin şəxsi və karyera inkişafındakı müsbət təsirini də qeyd etdi.

Sonra Saleh Bağırov gündəlik ünsiyyətdə ədəbi dil normativləri, düzgün nitqin əhəmiyyəti, ana dilinin zənginliyi, gənclərin şəxsi və peşəkar inkişafında mütaliənin vacibliyindən  geniş söhbət açdı. Ədəbi dil normalarının sabitləşməsində və möhkəmlənməsində ali məktəblərin də xüsusi rolu olduğunu, tamaşa və teatrlara getməyin, yanıltmaclar oxumaq və səsli şəkildə mütaliə etməyin dili cilalamasında və fikrin formalaşmasında, danışıq mədəniyyətini inkişaf etdirməkdə əhəmiyyətlini qeyd etdi.

Tədbirdə Dillər və ədəbiyyatlar departamentinin müdiri Dos. Dilbər Zeynalova, müəllimləri Dr. Almaz Bədəlova, Dr. Qardaşxan Əzizxanlı və digərlərinin maraqlı çıxışları oldu.

Tədbir interaktiv şəkildə davam etdi, tələbə və müəllimlərin sualları cavablandırıldı.