2025-ci il fevralın 2-3-də İstanbulda Beynəlxalq Elm və İncəsənət Araşdırma Mərkəzi (ISARC) tərəfindən təşkil olunan 9-cu Beynəlxalq Marmara Elmi Araşdırmalar və İnnovasiya Konqresində Xəzər Universitetinin Psixologiya departamentinin əməkdaşları Mələk Kərimova və Mirsadiq Muxtarov  "Birinci kurs universitet tələbələrinin cinsiyyətə görə psixoloji simptom göstəricilərinin təhlili" adlı tədqiqatla çıxış etdilər.

Onlar universitetə yeni daxil olmuş 204 həfər birinci kurs tələbəsi üzərində apardıqları tədqiqatın nəticələrini təqdim ediblər. Təqdimat zamanı universitet təhsilinə yeni başlayan tələbələrin həm tədris, həm də sosial-emosionallıq baxımından müxtəlif çətinliklərlə qarşılaşdıqları qeyd olunub. Mütəxəssislər, tələbələrin əvvəlki təhsil mərhələsindən fərqli olaraq, universitetə daxil olduqda daha çox məsuliyyət daşıdıqlarını və müstəqil həyata adaptasiya prosesində bir sıra psixoloji çətinliklərlə üzləşdiklərini vurğulamışlar. Bu dəyişikliklərin, onların psixoloji vəziyyətinə təsir edərək adaptasiya çətinliklərini artırması mümkündür.

Tədqiqatın nəticələrinə əsasən, qadın tələbələrin kişilərə nisbətən əhəmiyyətli dərəcədə daha yüksək psixoloji simptomlar nümayiş etdirdiyi müşahidə edilib. Bu, onların universitetə keçid prosesində daha çox psixoloji çətinliklər yaşadıqlarını və bu çətinliklərin onların ümumi adaptasiya qabiliyyətinə mənfi yöndə təsir etdiyini göstərir. Həmçinin, akademik gözləntilər və standartların tələbələr üçün əlavə stress mənbəyi olacağına dair tapıntılar diqqətə çatdırılıb.

Bu təqdimat iştirakçılar tərəfindən maraqla qarşılanmış və tədqiqatın universitet tələbələrinin psixoloji vəziyyətinin qiymətləndirilməsi sahəsində daha dərindən araşdırılmasına ehtiyac olduğunu bir daha ortaya qoymuşdur.