2024-cü il dekabrın 19-da Xəzər Universitetinin Psixologiya departamenti və Psixologiya klubunun birgə əməkdaşlığı ilə “Qaranlıqdan işığa: emosional dəstək və psixoloji rifah” mövzusunda  açıq seminar keçirildi. Seminar universitetin Psixologiya departamentinin koordinatoru və Xəzər Psixoloji Xidmət Mərkəzinin direktoru Mələk Kərimovanın təqdimatında baş tutdu. Mələk Kərimova emosional dəstəyin insan rifahında və intiharın qarşısının alınmasında nə qədər əhəmiyyətli olduğunu vurğuladı. İştirakçılara intihar riski ilə bağlı erkən xəbərdarlıq siqnalları, emosional sağlamlığın qorunması yolları və dəstək mexanizmləri barədə ətraflı məlumat verildi. 

Tədbir zamanı həm tələbələr, həm də cəmiyyətin müxtəlif təbəqələrindən olan iştirakçılar mövzu ilə bağlı öz fikirlərini bölüşdülər və sual-cavab sessiyasında fəal iştirak etdilər. Müzakirələr iştirakçıların yalnız nəzəri biliklər deyil, həm də real həyatda tətbiq edə biləcəkləri faydalı məsləhətlər əldə etməsinə imkan yaratdı. Seminarda iştirakçılarla birlikdə psixi rifahla bağlı  praktiki çalışmalar aparıldı.

Seminarın sonunda Mələk Kərimova hər bir şəxsin emosional rifahının qorunmasının cəmiyyət üçün vacib olduğunu qeyd edərək, psixoloji dəstək sistemlərinin inkişaf etdirilməsinin əhəmiyyətini vurğuladı.